BOBONARU, 11 Novembru 2025 (TATOLI)-Ezekusaun Orsamentu Jerál Estadu (OJE) tinan fiskál 2025 iha Autoridade Munisípiu Bobonaru atinje ona 84%, ekivale ba $8.579.141,35, husi totál alokasaun anuál $11.308.141.
Diretór Sekretariadu Finansa Autoridade Munisípiu Bobonaru, Donata Marques, konfirma katak progresu ezekusaun ba saláriu no vensimentu hamutuk $2.079.451,99 ka 75%, husi montante alokadu $2.761.552, bens no serbisu 768.618,83 ka 64% husi totál $1.377.833, transferénsia públika ezekuta 5.023.929,93 ka 93% husi $5.383.24.
Kapitál menór nia ezekusaun $87.900 ka 86% husi montante rihun $500 no kapitál no dezenvolvimentu gasta ona $619.240.60 (87%) husi totál alokasaun $1.285.782
Notísia relevante: Ezekusaun OJE 2025 iha Autoridade Bobonaru atinje ona 61%
“Orsamentu ne’e ita ezekuta tuir dekretu ezekusaun, katak ita ezekuta fahe ba trismestrál haat, kada trimestre tenke ezekuta 25%, agora iha trimestre dahaat nia atinje ona 84%, falta de’it 16% atu atinje 100%”, nia informa ba jornalista sira, ohin.
Donata Marques subliña katak husi totál kategoria lima ne’e progresu ezekusaun boot liu mak tansferénsia públika no ki’ik mak bens no serbisu.
“Nia razaun bens no serbisu ne’e ita uza ba manutensaun motorizada, karreta no mós loron nasionál ne’ebé ita atu komemora iha 28 Novembru no 31 Dezembru, pedidu manutensaun sira ita loke prosesu aprovizionamentu, entaun ita hein pedidu pagamentu husi kompañia fornesedora sira hato’o mai halo pagamentu. Entaun, mudansa ona ba progresu ezekusaun”, nia esplika esplika.
Totál verba alokadu ba Autoridade Munisípiu Bobonaru tinan 2025 ne’e hodi finansia ba programa 16, subprograma 35 no atividade 80.
Notísia relevante: Autoridade Bobonaru sei implementa projetu PDIM 2025 iha tempu badak
Jornalista: Sérgio da Cruz
Editora: Maria Auxiliadora
