DILI, 13 Novembru 2025 (TATOLI)–Sekretáriu Jerál organizasaun intergovernamentál g7+, Helder da Costa, kinta ne’e, hasoru malu no htao’o relatóriu servisu tinan 2025 ba Prezidente Repúblika José Ramos-Horta.
Notísia Relevante: Ramos-Horta husu g7+ realiza forum Nobel da Paz ASEAN iha TL
“Ami mai hasoru-malu ho Prezidente Repúblika hodi relata relatóriu servisu ami-nian, tanba tinan 2025 besik ramata ona entaun ami mai atu relata ami-nia relatoriu servisu,” Sekretáriu-Jerál g7+, Helder Costa, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairu Pite.
Nia dehan, relatoriu ne’ebé aprezenta ba Xefe Estadu liuliu simeira nivel aas g7+ nian ne’ebé foin lalais hala’o iha Nova Iorke
Sekretáriu Jerál ne’e dehan, Prezidente Repúblika Sierralione nomeia ona ba konsellu eminente durante simeira nivel aas iha Nova Iorke, hamutuk ho Kay Rala Xanana Gusmão no Prezidente Repúblika José Ramos-Horta nu’udar enviadu espesiál ba mediasaun g7+ nian.
“Hanesan rezultadu husi simeira, ami mós estabelese sentru resposta lalais ida ba Estadu-membru sira g7+ nian iha Nova Iorke. Ne’e hanesan sentru resposta lalais ida ba Estadu-membru sira iha negosiasaun sira kona-ba rekursu naturál sira, relasionadu ho kontratu sira entre sira ho empreza multinasionál sira. Tanba ne’e, Sekretaria g7+ estabelese sentru resposta lalais ida hodi tulun Estadu-membru sira-ne’ebé presiza asisténsia,” Helder hateten.
Alende ne’e, Sekretariu Jerál ne’e atualiza mós ba Xefe Estadu kona-ba organizasaun ne’e nia ajenda ba tinan 2026 liuliu kona-ba partisipa intervensaun sira konsellu Direitu Umanu ne’ebé hala’o iha Jenebra kada tinan.
Jornalista : Hortencio Sanchez
Editór : Cancio Ximenes
