DILI, 18 Novembru 2025 (TATOLI)—Polísia Nasionál Timor-Leste (PNTL) liuhusi Diresaun Nasionál Servisu Investigasaun Kriminál (DNSIK) no Ministériu Públiku (MP), Tersa ne’e, detein sidadaun xineza ho inisiál SD.
Atuasaun ne’e, hafoin Autoridade Servisu Migrasaun ne’ebé destakadu iha Aeroportu Internasionál Prezidente Nicolau Lobato, Komoro, maizumenus tuku 12:00 ohin, la autoriza SD atu halo viajen bá nia nasaun orijen Xina.
Pesoál husi Servisu Imigrasaun bainhira halo pasa revista ba SD nia dokumentu, liuhusi sistema deteta katak antes ne’e suspeitadu iha ligasaun ho oknum PNTL ho Insiál M ne’ebé nu’udar membru Korpu Seguransa Pesoál (CSP) fasilita pistola no kilat boot ba SD hodi treinu tiru iha área Kaitehu, Munisípiu Likisá, iha 15 Setembru 2025.
Ho nune’e, sistema imigrasaun la fó nia atu halo viajen bá fali nia nasaun orijen.
Hafoin Servisu Migrasaun destakadu iha Aeroportu deteta, komunika kedan ba DNSIK hodi asegura kedan sidadaun ne’e.
Notísia relevante : Komandu PNTL dezarma no suspende membru CSP ne’ebé fasilita kilat ba xineza
Durante faze identifikasaun, MP liuhusi Prokuradór João Marques, autoriza PNTL liuhusi DNSIK halo detensaun fora husi fraglante Delitu no halo apreensaun ba SD nia pasaporte.
PNTL ezekuta MP nia orientasaun hodi halo detensaun ho oras 72 iha sela Komandu PNTL Munisípiu Dili.
Bainhira PNTL atu halo apreensaun ba SD nia pasaporte, nia lakohi asina dokumentu apreensaun, nune’e hafoin halo aprosimasaun hahú tuku 18:00 to’o 20:30, ikus mai sidadaun ne’e koopera hosi asina karta hodi entrega pasaporte.
Jornalista Ajénsia TATOLI tenta atu konfirma asuntu ne’e ba SD nia Defeza maibé lakohi fó komentáriu.
Antes ne’e, Komandu PNTL liuhusi despaisu Komandante Jerál PNTL, Komisáriu Jerál Polísia Henrique da Costa hasai despaixu hodi aplika sansaun disiplinar ba membru CSP ne’e.
Husi DNSIK halo ona prosesu kriminál hasoru membru CSP no rejista ona iha MP ho NUC 0313/25.PNSIC.
Jornalista : Natalino Costa
Editora : Julia Chatarina
