DILI, 21 Novembru 2025 (TATOLI)-Bankada Partidu Kongresu Nasionál Rekonstrusaun Timor-Leste (CNRT, sigla portugés) sei hato’o keixa ba Ministériu Públiku (MP) hasoru bankada opozisaun FRETILIN, tanba halo dimafasaun.
Kestaun ne’e, deputadu CNRT, Óscar de Araújo, hato’o liuhusi deklarasaun votu bankada nian hafoin halo aprovasaun finál globál ba proposta Orsamentu Jerál Estadu (OJE) 2026, iha Parlamentu Nasionál.
Bankada konxiente, diskusaun orsamentu Estadu ba tinan ne’e, diferente tebes, tanba deputadu opozisaun sira barakliu foku ba diskusaun deznesesáriu sira hodi haluha tiha atu diskute alokasaun orsamentu ne’ebé inovativu no estratéjiku, ne’ebé Governu Dasiak mai aprezenta iha Parlamentu.
Nia hateten, iha impresaun ida katak opozisaun laiha tiha utilidade iha Parlamentu, tanba hatudu diskripánsia entre akuzasaun, ataka versu evidénsia no faktu.
“Relasaun ho kestaun ida-ne’e, ho baze Kódigu Penál nian, ami konsidera aktu ne’e nu’udar krime difamasaun no kalúnia ne’ebé halo husi deputadu bankada FRETILIN nian no autór sira seluk perante iha públiku, tanba-ne’e, bankada CNRT deklara iha ne’e katak sei halo prosesu legál ba oin’’, nia hato’o.
Hodi dehan, ida-ne’e akontese tanba hetan motivasaun extralegál no laiha ona pasiénsia, sa tán, dalan hotu-hotu agora taka metin hodi la fó oportunidade halo manipulasaun. Tanba-ne’e, plenária sai tiha fatin ba espresaun vingansa pesoál hodi halo manipulasaun polítika ne’ebé hakarak atu kare rai-rahun de’it ba povu ninia matan.
Antes ne’e, iha debate espesialidade proposta OJE 2026, deputadu FRETILIN, Florentino Ximenes ‘Sinarai’, levanta beibeik iha intervensaun hodi preokupa no halo krítika maka’as ho kazu online scam ne’ebé akontese iha Oekusi no presiza kombate, tanba konsidera iha grupu mafiozu ne’ebé alega deskonfia envolve husi membru Governu Dasiak balun.
Hodi deklara katak nu’udar reprezentante povu sei la nonook hodi ko’alia defende buat ne’ebé loos ba povu ninia di’ak, tanba ne’e membru Governu ne’ebé sente halo difamasaun bele hato’o keixa ba justisa, no nia-parte la presiza hasai imunidade no prontu ba hatán.
Notísia relevante: https://tatoli.tl/2025/11/07/governu-kontinua–esforsu-hodi-kombate-krime-transnasional-iha-tl/
Jornalista: Nelson de Sousa
Editora: Maria Auxiliadora
