PM agradese Parlamentu Nasionál tanba halo diskusaun ho forma demokrátika
DILI, 28 Maiu 2026 (TATOLI)-Primeiru-Ministru (PM), Xanana Gusmão, agradese deputadu sira iha Parlamentu Nasionál ne’ebé halo diskusaun ba proposta Orsamentu Retifikativu (OR) ho demokrátiku.
“Agradese tebetebes ba Parlamentu Nasionál, ba bankada sira-hotu, komisaun sira-hotu, ne’ebé simu ona ami-nia pedidu halo diskusaun sira-ne’e ho karáter urjénsia, nomós agradese tebes partisipasaun aberta, onesta, demokrátika husi bankada sira hotu”, Xanana Gusmão hateten iha Parlamentu Nasionál, iha ámbitu diskusaun Orsamentu Retifikativu.
Xefe Governu agradese Parlamentu tanba debate loloos halo durante loron rua, maibé diskute loron ida de’it, liuliu kontribuisaun di’ak ne’ebé deputadu sira ko’alia sai ba públiku.
“Ami sei toma nota ba preokupasaun husi bankada sira hothotu, tanba ita-nia problema mak ida-ne’e. Se, iha sala korrije. Korrije para ita bele la’o nafatin, serbí ita-nia povu”, Xanana dehan.
Iha debate ne’e, Governu kompromete sei ezekuta ho transparénsia no seriedade Orsamentu Retifikativu tuir duni prioridade hitu ne’ebé define ona.
Ministra Finansa, Santina Cardoso, dehan rekomendasaun sira ne’ebé bankada sira fó, liuliu Komisaun C ne’ebé fó atensaun ba Governu atu zekuta OR tuir medida sira ne’ebé tau ho prinsípiu legalidade, transparénsia, nune’e nomós jestaun di’ak ba finansa públika.
“Ministériu Finansa toma nota ba kestaun hirak ne’e. Ami nafatin aprezenta ba Parlamentu kona-ba relatóriu ezekusaun ba medida sira ba Orsamentu Retifikativu nian”, ministra dehan.
Tanba ne’e, Ministériu Finansa kompromete katak relatóriu ba medida sira ne’ebé Governu halo ba ezekusaun orsamentál bele toma atensaun atu nafatin fó informasaun ba deputadu sira.
Kona-ba rekomendasaun husi Komisaun C nian, Governu kontinua reforsa auditoria interna ba monitorizasaun ezekusaun orsamentál nian no Ministériu Finansa kontinua fó formasaun ba auditoria interna husi liña ministériu idaidak, atu sira hatene akompaña ezekusaun idaidak nian.
Nia akrexenta katak ho rekomendasaun sira ne’ebé iha, Governu anota no nafatin aprezenta tabela orsamentál orijinál husi Orsamentu Jerál Estadu 2026, no alterasaun sira ne’ebé akontese antes no depois Orsamentu Retifikativu.
Proposta Orsamentu Retifikativu ne’e ho montante millaun $192 ne’ebé foku ba prioridade hitu.
Notísia relevante: Orsamentu Retifikativu prevee medida hitu hodi responde ba impaktu husi funu iha Médiu Oriente
Jornalista: Arminda Fonseca
Editora: Maria Auxiliadora
