DILI, 27 Novembru 2025 (TATOLI)—Vise Primeiru-Ministru no Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, informa joven mak esperansa ba prosesu konstrusaun dezenvolvimentu nasaun nian.
“Joven sira tenke esforsu, haka’as-aan no estuda hodi aprende iha fatin hotu tanba joven mak esperansa ba futuru nasaun,” Assanami dehan iha Katedrál, Dili, Kinta ne’e, relasiona ho tinan 50 Proklamasaun Independénsia RDTL.
Nia informa katak Timor-Leste hahú tama iha merkadu globál liuhusi Asosiasaun Nasaun Sudeste Aziátiku (ASEAN-sigla ingleza), tan ne’e tenke hasa’e kualidade umana atu kompete.
Iha biban ne’e, Vise-Ministru ne’e husu ba inan-aman sira kuidadu ki’ikoan sira, tanba ki’ikoan sira mak Timor nia futuru, haka’as sira (labarik ki’ikoan sira) hodi aprende, estuda hodi hakat tuir ain fatin asu’ain sira-nian.
Iha fatin hanesan, Xefe Estadu Maiór Jenerál Forsa Armada (XEMGFA), Tenente Jenerál Domingos Raul ‘Falur Rate Laek’, hateten joven tenke sai modelu no kontinua sai ezemplu ba pás iha nasaun demokrátika.
“Iha fatin ne’e ita haree dezenvolvimentu la’o no diferensa barak liu, ne’ebé ita hotu tenke orgullu ba ida-ne’e,” Jenerál Falur dehan.
Jornalista: Osória Marques
Editór: Xisto Freitas da Piedade
