DILI, 16 Dezembru 2025 (TATOLI)-Primeiru-Ministru Austrália, Anthony Albanese, sei hala’o vizita ofisiál mai Timor-Leste entre loron 28 no 29 Janeiru 2026.
Prezidente Parlamentu Nasionál, Maria Fernanda Lay, informa ida-ne’e liuhusi reuniaun plenária Parlamentu, ohin, tanba Parlamentu sei realiza sesaun solene.
“Preparativu feitu ona no ha’u hanoin katak deputadu sira, ita-nia intervensaun hanesan nasaun CPLP sei halo [ho] portugés no iha tradusaun inglés simultánea iha sesaun solene”, nia informa.
Iha parte seluk, Vise-Ministru ba Asuntu Parlamentár, Adérito Hugo, hateten relasaun bilaterál país rua kle’ur ona no forte tebes.
“Espera vizita ne’e, ita-nia kooperasaun forte no foka mós ajenda sira prinsipál ba kontinuasaun serbisu país rua nian ba oin”, dehan.
Lembra katak Primeiru-Ministru, Xanana Gusmão, antes ne’e mós atualiza ona vizita Xefe Governu australianu, iha tinan 2026, ba Prezidente Repúblika, José Ramos-Horta, iha enkontru semanál, iha Palásiu Prezidensiál, Bairru Pité, foin lalais ne’e.
Notísia relevante: Governu Timor-Leste parabeniza Anthony Albanese ne’ebé reeleitu hanesan Primeiru-Ministru Austrália
Jornalista: Nelson de Sousa
Editora: Maria Auxiliadora
