DILI, 05 Maiu 2025 (TATOLI) – Governu Timor-Leste felisita Primeiru-Ministru Anthony Albanese ne’ebé reeleitu hodi lidera Governu Commonwealth Austrália nian.
Tuir nota ne’ebé Tatoli asesu, Primeiru-Ministru Albanese hala’o papél importante ida hodi aprofunda relasaun bilaterál entre Timor-Leste no Austrália, iha nia mandatu dahuluk, ne’ebé reflete iha kooperasaun ne’ebé aumenta iha área estratéjika oioin, no mós diálogu ne’ebé kontinua kona-ba esplorasaun konjunta ba rekursu iha Tasi Timór.
“Governu Timor-Leste hein atu kontinua serbisu hamutuk ho Primeiru-Ministru Albanese no ninia administrasaun hodi avansa ita-nia objetivu komún sira no aprofunda liután ita-nia relasaun bilaterál”, Ministru Prezidénsia Konsellu Ministru, portavós Governu no interlokutór Timor-Leste nian iha negosiasaun kona-ba Projetu Greater Sunrise, Agio Pereira, afirma.
Timor-Leste reafirma ninia kompromisu ba parseria ida ne’ebé bazeia ba respeitu mútuu, boa fé no vontade hamutuk hodi promove pás, estabilidade no prosperidade iha rejiaun ne’e, no dezeja ba Primeiru-Ministru Anthony Albanese atu susesu nafatin iha ezersísiu ninia mandatu, nune’e mós progresu kontínuu no moris-di’ak ba povu australianu.
Iha eleisaun ne’ebé realiza iha loron 03 Maiu, iha Austrália, Partidu Traballista ne’ebé lidera husi Albanese manán hodi halakon nia adversáriu prinsipál husi Partidu Liberál, Peter Dutton.
Vitória ne’e halo Albanese hanesan primeiru-ministru dahuluk husi Partidu Traballista ne’ebé asume kargu ba dala-rua tuituir malu iha dékada ikus ne’e. Partidu Traballista halakon nia koligasaun konservativa Partidu Liberál no Partidu Nasionál.
Komisaun Eleisaun Jerál Austrália fó sai katak Partidu Traballista ne’ebé manán maioria hetan kadeira 70 no koligasaun opozisaun konservativu hetan kadeira 24 iha Parlamentu ne’ebé iha membru hamutuk 150. Partidu sira ki’ikoan ne’ebé la koliga no kandidatu independente hetan kadeira 13.
Albanese moris iha 1963 husi nia inan ne’ebé mai husi jerasaun Irlanda. Nia boot iha Camperdown, iha sidade parte oeste Sydney, nia eskola iha Eskola Bázika São José no Koléjiu Katedrál Santa Maria.
Nia karreira polítika hahú iha inísiu 1980, ne’ebé inspira husi nia inan ne’ebé tama iha Partidu Traballista. Nia manán elisaun dahuluk iha tinan 33 iha 1996.
Nia kontinua mantein nia kadeira, ne’ebé hahú iha nia nomeasaun hanesan primeiru-ministru Austrália ba da-31 iha Maiu 2022. Nia mak líder Partidu Traballista dahuluk ne’ebé forma governasaun dezde 2013.
TATOLI
