DILI, 23 Dezembru 2025 (TATOLI)—Embaixadór Timor-Leste ba Portugál, Manuel Serrano, kompromete sei hala’o misaun ho di’ak tuir akordu programa estratéjiku 2024 to’o 2028.
Embaixadór Timor-Leste ba Portugál, Manuel Serrano, hateten normalmente tuir prosedimentu ba embaixadór foun sira atu aranka ba hala’o misaun iha rai-li’ur sei mai kumprimenta no husu mós orientasaun husi Primeiru-Ministru atu fó kontinuidade ba servisu hotu ne’ebé embaixadór anteriór sira hala’o ona.
“Ohin, ha’u hetan opoerunidade di’ak mai kumprimenta nomós mai despede hodi rona orientasaun husi Xefe Governu. Xefe Governu fó atensaun ba programa estratéjiku kooperasaun ne’ebé antes ne’e Timor-Leste ho Portugál asina ona liuliu ba programa sira iha tinan 2024 to’o 2028, inklui mõs fó atensaun ba komunidade timorense sira-ne’ebé bela iha Portugál,” diplomata ne’e informa ba jornalista sira iha Palásiu Governu, ohin.
Enkuantu, nia dehan, programa estratèjiku sira-ne’e sei foka liu ba área edukasaun, justisa, seguransa defeza no ekonómia azúl, tuir kritéria sira-ne’ebé mak hakerek ona iha akordu bilaterál nian.
“Nune’e, ha’u ba sei servisu kontinua ba programa sira-ne’ebé embaixadór anterior sira implementa ona no asegura nafatin reprezentasaun ne’ebé mak di’ak iha nasaun importante ida hanesan iha Portugál,” nia dehan.
Entretantu, tuir informasaun tempu badak nia sei dezloka ba Portugál tamba sei hein hela prosesu administrativu ne’ebé sei trata hela ho Ministériu Negósiu Estranjeiru no Kooperasaun.
Jornalista : Alexandra da Costa
Editór : Cancio Ximenes
