DILI, 23 Dezembru 2025 (TATOLI)-Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, louva partisipasaun sarani hotu iha peregrinasaun tinan Jubileu 2025, ne’ebé sai momentu ba sarani sira atu nafatin moris iha grasa Maromak nian.
Nia dehan tinan Jubileu, Konferénsia Episkopál la organiza atividade ne’ebé formál, maibé fó liberdade ba parókia no sarani sira, ho ida-ne’e haree katak resposta ida ne’ebé maka’as tebes.
Tanba iha parókia hotu organiza peregrinasaun bá fatin ne’ebé iha dioseze tolu marka destinasaun no sei taka iha 28 Dezembru.
“Peregrasaun dezde Janeiru tinan ne’e, iha grupu barak la’o ho inisiativa, no sarani balun halo peregrinasaun bá Vatikanu. Agradese hodi fó parabens ba ema hotu ne’ebé hatán ba Maromak nia bolu ida-ne’e, hodi prepara-an aproveita grasa Jubileu nian, la’ós mai tinan-tinan, maibé tinan 25 dala-ida”, nia hato’o iha Lesidere, ohin.
Ne’e duni, tuir Kardeál, grasa ne’ebé hetan iha tinan ida-ne’e hein katak bele sai momentu di’ak ida konversaun, rekonsiliasaun hodi moris nafatin iha Maromak nia grasa.
“Timoroan barak aproveita duni, hein iha oportunidade sira hanesan ne’e ita buka atu aproveita oportunidade ne’ebé Santa Kreda tau ba ita idaidak nia nesesidade espirituál”, dehan.
Notísia relevante:https://tatoli.tl/2025/02/13/peregrinasaun-ba-tinan-jubeliu-2025-hahu-lao/#
Jornalista: Nelson de Sousa
Editora: Maria Auxiliadora
