DILI, 30 Dezembru 2025 (TATOLI) – Asosiasaun Alumni Universitas Kristen Artha Wacana Kupang (UKAW) Timor-Leste formaliza estrututura organizasaun nian hodi simu pose ba períodu tinan rua (2025-2027).
Estrututura ne’ebé simu pose mak Prezidente Konselleiru Alumni UKAW Timor-Leste, Mateus Salvador, Vise-Konselleiru 1, Kristovao Barros, Vise-Konselleiru 2, Fernando da Silva, Vise-Konselleiru 3, António Oliveira de Carvalho.
Prezidente Alumi UKAW Timor-Leste mak Daniel Soares dos Santos, Vise-Prezidente, Vasco Ribeiro, Sekretária-Jerál, Rini Fatmawati Alves da Cruz, Vise-Sekretáriu, Sérgio Fernandes Sarmento, no Tezoreira, Marta Julmira.
Aleinde ne’e, formaliza mós estrutura husi Departamentu Organizasaun no Departamentu Relasaun Internasionál husi Reitór UKAW Kupang NTT, Prof. Dr. Ir. Godlief F. Neonufa.
Prezidente Alumni UKAW Timor-Leste, Daniel Soares dos Santos, hateten objetivu estabelese asosiasaun ne’e atu akumula timoroan sira ne’ebé bá eskola iha UKAW Kupang husi kada turnu (angkatan ba angkatan) hodi kontribui ba dezenvolvimentu nasaun nian, liuhusi idaidak nia knaar ne’ebé iha.
“Ita kria asosiasaun ne’e, tau forsa hamutuk oinsá ita fó kontribuisaun husi idaidak nia serbisu ba dezenvolvimentu nasaun nian”, Daniel dos Santos dehan ba Tatoli iha Eskola Kameli Internasionál Timor-Leste, ohin.
Nia esplika katak ezisténsia asosiasaun ne’e importante tebes, tanba timoroan barak hahú husi tinan 1985 bá hala’o estudu iha UKAW no to’o agora balun la koñese malu, nune’e ho estabelesimentu asosiasaun ne’e bele koñese malu hodi fó ideia no tulun malu hodi kontribui ba dezenvolvimentu nasaun nian.
Nia hatutan katak UKAW rasik la’ós de’it fatin ba aprende dixiplina, maibé oinsá forma ema nia karáter, étika no responsabilidade sosiál.
Nune’e timoroan sira ne’ebé bá eskola iha UKAW kuaze fila hothotu serbisu iha área oioin hanesan iha edukasaun, balun sai membru Governu no deputadu no deputada, balun halo negósiu no seluk tan.
“Ida-ne’e prova katak UKAW sai nu’udar ponte ida ba matenek nian no kria relasaun maun-alin entre Indonézia no Timor-Leste. Tuir dadus provizóriu, ita rejista ona alumi hamutuk 100-resin”, nia relata.
Ho pose ba estrutura maka sei implementa planu no prioridade sira, liuliu harii kooperativa kréditu, fó formasaun, loke negósiu no seluk tan.
Iha biban ne’e, Reitór UKAW Kupang NTT, Prof. Dr. Ir. Godlief F. Neonufa, husu ba estrutura sira atu kontinua hamorin universidade nia naran iha Timor-Leste.
“Kontinua hamorin naran UKAW iha Timor-Leste liuhusi ita boot sira-nia serbisu, nafatin apoiu iha parte hothotu, labele haree ba ba kór, rasa ka relijiaun, maibé hamutuk sai ida de’it kontribui buat di’ak ba ita-nia komunidade no nasaun”, nia hato’o.
Ho ezisténsia Asosiasaun Alumni UKAW, tuir nia, ida-ne’e hanesan parte ida oinsá hametin relasaun entre país rua husi agora no ba futuru.
Jornalista: Arminda Fonseca
Editora: Maria Auxiliadora
