DILI, 01 Janeiru 2026 (TATOLI) – Diresaun Nasionál Infraestrtutura no Komunikasaun (DNIK), Ministériu Transporte no Komunikasaun, rekolla entre husi Janeiru no Dezembru 2025, reseita hamutuk rihun $300 ba kofre Estadu.
Diretór Nasionál Infraestrtutura no Komunikasaun, Ambrósio Amaral, esplika katak reseita sira ne’ebé rekolla ne’e mai husi fonte prinsipál rua mak aluga fibra ótika ba Eletrisidade Timor-Leste (EDTL) no domain.tl.
Nia salienta katak relasiona ho ezekusaun Orsamentu Jerál Estadu (OJE) 2025, to’o 31 Dezembru atinje 99% husi totál alokasaun $2.956.227.
“Ita ezekuta ho di’ak tanba la’o tuir planu no programa ne’ebé iha, liuliu oinsá konekta rede internét fibra ótika ba instituisaun Estadu, sentru saúde no eskola públika hamutuk 303 no seluk tan”, nia relata.
Lembra katak, iha 2024, DNIK rekolla reseita rihun $259 ba kofre Estadu. Aleinde ne’e, diresaun mós rejista domain ativu hamutuk 2.251, kompostu husi gov.tl iha 237, .tl 1.732, .com.tl 137, .edu.tl 52, mil.tl 20, net.tl 26 no org.tl 47.
Notísia relevante: Instituisaun Estadu 303 konekta rede internét fibra ótika nasionál iha 2025
Jornalista: Arminda Fonseca
Editora: Maria Auxiliadora
