DILI, 08 Janeiru 2026 (TATOLI)—Primeiru-Ministru, Kay Rala Xanana Gusmão, hala’o enkontru semana dahuluk tinan 2026 ho Prezidente Repúblika, José Ramos Horta ba preparasaun hodi simu Primeiru-Ministru Austrália, Hon Anthony Albanese, ne’ebé sei vizita Timor-Leste iha 28 Janeiru 2026.
“Ami na’in-rua ko’alia uitoan kona-ba Primeiru-Ministru Austrália ne’ebé atu mai iha Timor. Nune’e, ita sei halo preparasaun ba ida-ne’e,” Xefe Governu ne’e relata ba jornalista sira iha Palásiu Prezidensiál Bairru Pite, ohin.
Líde polítika ne’e afirma, Xefe Governu Austrália sei mai iha loron 28 fulan-Janeiru tinan 2026 ne’e, tanba ne’e sira sei koordena nafatin atu simu oinsá no importante ba ita atu simu Primeiru-Ministru Astrália, nune’e iha semana ida-nia laran mak sei informa fali.
“Ha’u labele dehan lai ninia objetivu husi vizita ida-ne’e, tanba sei iha prosesu preparasaun no atividade ne’ebé nia sei halo iha ne’e depois mak informa ba ita-boot sira,” nia hateten.
Iha biban ne’e, nia informa enkontru ida-ne’e sira ko’alia kona-ba kompeténsia Timor-Leste nu’udar prezidénsia CPLP, nune’e iha tinan ida-ne’e sei iha atividade lubuk ida-ne’ebé sira haree hela tamba iha loron 17 Jullu CPLP halo tinan ba da-30
“Ho nune’e enkontru ho xefe CPLP nian ho maneira online de’it. Tanba ne’e, akontese ona durante iha tempu COVID-19 nian. Ikus-ikus ne’e mós online depois mak sei informa ba públiku tanba ne’e servisu Ministériu Negósiu Estranjeiru no Kooperasaun nian,” nia dehan.
Enkuantu, kona-ba asuntu ASEAN nian ne’e Timor-Leste mós tama tiha ona sai membru plenu, maibé servisu seidauk hotu nentaun nia mai informa ba Xefe Estadu kona-ba regra ka roteiru ASEAN nian katak Ministru ida atu ba partisipa enkontru iha rai-li’ur tenke relata iha Konsellu Ministru no fila-fali mai mós tenke informa atu hotu-hotu hatene, tamba buat ne’e la’ós ida-idak halo ninia.
“Ha’u mós ko’alia ba Prezidente, iha loron 31 kalan, ha’u ba taka orsamentu 2025 nian no haree katak iha ajenda balun ne’ebé la konsege ezekuta hotu. Ha’u mós bolu atensaun katak ida ne’e sai hanesan lisaun ida no fatór ida-ne’ebé bele ejije ba Governu atu haree didi’ak alokasaun orsamentu hodi ezekuta ho di’ak atu osan sira bele fó reseitas ba kofre Estadu”, nia hatutan.
Jornalista : Alexandra da Costa
Editór : Cancio Ximenes
