DILI, 14 Janeiru 2026 (TATOLI) – Ahi han iha área food court iha andár ida, iha Timor Plaza, pur volta tuku 9h45 dadersán, ne’ebé kauza husi fuga gás.
Inséndiu ne’e akontese bainhira empregada sira prepara ai-han iha food court ida ho naran My Resto Snack and Bar.
Tuir observasaun Tatoli iha terrenu, hafoin inséndiu, vizitante no funsionáriu sira hotu iha edifísiu laran halai sai bá fatin estasionamentu nian. Sira pániku, tanba ahi han ne’e mosu iha andár kraik, dalan prinsipál ba atividade vizitante nian.
Maibé ekipa lojístika no seguransa Timor Plaza nian responde lalais ho uza aparelu hamate inséndiu nian molok hada’et ba área sira seluk.
Ho inséndiu ne’e, Autoridade Protesaun Sivíl ka Bombeiru, ne’ebé rona informasaun liu husi rádiu to’o kedas iha fatin akontesimentu ho ekipamentu kompletu. Bainhira to’o iha Timor Plaza, ahi ne’e kontrola tiha ona husi ekipa interna Timor Plaza nian.
Akontesimentu ne’e la rezulta vítima ruma, maibé iha área food court nian mak taka provizoriamente, tanba razaun seguransa nian.
Xefe Seksaun Unidade Bombeiru Protesaun Sivíl, Juvino Alsantos, hateten sira-nia prezensa iha ne’e la’ós hetan kontaktu husi dirijenteTimor Plaza maibé liuhusi rádiu.
“Ami akompaña rádiu bainhira bolu husi delta bus dehan presiza bombeiru nia ajuda, entaun ami to’o kedas. Maibé, ami to’o mai parte Timor Plaza uza gás hamate ona”, nia relata.
Nia observa katak insendiu ne’e akontese tanba kauza husi gás mak nakfera.
To’o publikasaun ida-ne’e, responsavel husi Timor Plaza nomós food court seidauk fó sai deklarasaun ofisiál relasiona ho inséndiu ne’e.
Jornalista: Arminda Fonseca
Editora: Maria Auxiliadora
