DILI, 15 Janeiru 2026 (TATOLI) – Sekretaria Estadu Formasaun Profisionál no Empregu (SEFOPE) haruka, iha inisísiu Fevereiru, traballadór timoroan na’in-sanulu, nu’udar pilotu dahuluk bá serbisu iha Nova Zelándia.
Diretór Nasionál Empregu Estranjeiru iha SEFOPE, João Correia Pereira, hateten traballadór na’in-10 ne’e tuir ona teste iha tinan kotuk, ne’ebé fó direita husi empregadór sira husi empreza Fairfield Orchards Nova Zelándia.
“Ita sei haruka na’in-sanulu hanesan pilotu dahuluk bá Nova Zelándia, hafoin ida-ne’e sei iha empregadór haat mai rekruta tan”, João Correia Pereira dehan ba Tatoli iha City 8 Manleuana, Dili.
Lembra katak, iha Outubru 2025, Governu liuhusi SEFOPE fó teste ba kandidatu traballadór Nova Zelandia na’in-11.
Teste dahuluk iha faze entrevista antes sai traballadór Sazonál Rekoñesidu (RSE, sigla inglés) Nova Zelándia, ne’ebé asisten direta husi Sekretáriu Estadu Formasaun Profesionál no Empregu, Rogério Araújo Mendonça, no Embaixadora Nova Zelándia iha Timor-Leste, Hellen Tunah.
Kandidatu sira-ne’ebé lista naran iha ona sistema PALM Austrália nian, maibé hakarak kandidata tuir e-mail ba iha vaga RSE Nova Zelándia hamutuk rihun 3.
Notisía relevante: SEFOPE hahú fó teste ba kandidatu traballadór Nova Zelandia na’in-11
Jornalista: Arminda Fonseca
Editora: Maria Auxiliadora
