DILI, 19 Janeiru 2026 (TATOLI)—Ekipa AD SLB impata 0-0 bainhira kontra Emanuel Football Club, enkuantu DIT FC derrota 1-2 ho Assalam FC iha abertura jogu Tasa Liga Federasaun Futeból Timor-Leste (FFTL) 2025 ne’ebé hala’o iha Estádiu Munisipál Dili, Sábadu (17/01/2025).
Jogu entre AD SLB ho Emanuel FC hetan apresiasaun maka’as husi adeptu sira maibé ekipa rua fahe pontu ba malu hafoin tabela skor hatudu 0-0 to’o jogu ramata.
Notísia relevante: Tasa Liga FFTL sei hahú iha semana oin
Enkuantu, jogu daruak entre DIT FC no Assalam hala’o iha loron hanesan, DIT derrota ho skor 1-2 ne’ebé golu tolu referidu prodús iha parte dahuluk bainhira Martinho Lopes lori Assalam lidera uluk iha minutu 13, no golu daruak enxe husi Emildo Casimiro iha minutu 34.
DIT FC responde golu ida iha minutu ikus antes parte dahuluk ramata liuhusi jogadór Elvis da Silva, maibé to’o jogu ramata tabela skor kontinua mantein 1-2.
Entretantu, klube 13 ne’ebé partisipa iha kompetisaun Tasa Liga FFTL kompostu husi Karketu Dili FC, Emanuel FC, Coração FC, AD SLB, Porto Taibessi, Assalam FC, DIT FC, As Marca, Aitana FC, Nagardjo, FIEL, Santa Cruz no Lika-Lika FC.
Jornalista: Natalino Belo
Editór: Xisto Freitas da Piedade
