VIKEKE, 29 Janeiru 2026 (TATOLI)—Diretór Servisu Munisipál Apoiu Organizasaun Naun Governamentál ba Organizasaun Komunitária Munisípiu Vikeke, Cosme Sarmento informa, daudaun ne’e, falta ofisiál Teknolojia Informasaun (IT) iha postu administrativu tolu iha Munisípiu Vikeke.
“Daudaun ne’e falta ofisiál IT iha Postu Lakluta, Vikeke Vila no Uatulari. Ofisiál sira-ne’e ba fali ona servisu iha fatin seluk. Entaun, ida-ne’e sai hanesan preokupasaun ba ami tanba ofisiál sira-ne’e mak hatama dadus ba sistema no halo manutensaun ba ekipamentu komputadór no makína emprime iha suku sira,” Cosme Sarmento hateten iha resintu Administrasaun Munisipál Vikeke, Kinta ne’e.
Cosme haktuir durante ne’e autoridade suku sira hato’o beibeik hodi substitui ofisiál IT iha postu tolu ne’e maibé seidauk iha rezultadu, tan ne’e solisita Ministériu Administrasaun Estatál (MAE) hodi kontrata fali ofisiál IT ba postu tolu ne’e.
Hatán ba preokupasaun ne’e, Atuál Diretór Diresaun Nasionál Apoiu Administrasaun Suku (DNAAS) husi MAE, Celestino Marques, hateten ofisiál IT sira-ne’e MAE nasionál mak rekruta hodi koloka ba postu sira, maibé agora laiha ona tenke buka solusaun hodi atualiza sistema iha postu administrativu sira.
“Kuandu ofisiál IT sira-ne’e rezigna an, imi tenke fó hatene nasionál. Se lae nasionál lahatene. Ohin ha’u mai mak foin rona ida-ne’e. Autoridade sira tenke relata ba nasionál hodi solusiona, atu labele impede servisu sira liuliu atualiaza sistema dadus no garante ekipamentu informátiku sira-ne’ebé Governu disponibiliza iha postu no suku sira,” nia subliña.
Jornalista: Vitorino Lopes da Costa
Editór: Xisto Freitas da Piedade
