DILI, 29 Janeiru 2026 (TATOLI)-Reprezentante povu iha Parlamentu Nasionál husu ba Ministériu Edukasaun (ME) atu kria kondisaun ba profesór sira ne’ebé destaka iha área remota sira iha territóriu.
Iha kontaktu eleitorál iha baze, deputadu Frente Revolusionária Timor-Leste Independente (FRETILIN), Maria Angélica Rangel, simu preokupasaun husi manorin balun ne’ebé destaka iha área rurál no husu atensaun ministériu nian, liuliu kria kondisaun no presiza revee subsídiu ne’ebé atu selu ba profesór sira, tanba dalaruma tarde.
“Ita-nia maluk feto balun ne’ebé husi postu administrativu Fatuberliu, maibé nia destaka fali bá Turiskai, nia atu mai Same halo enkontru ho Edukasaun la’o oras neen mak foin to’o. Presiza haree kondisaun ema nian, no ita-nia maluk feto ne’e hanesan inan, ninia oan sei ki’ik mezmu sei susu, maibé tenke so’e hela’’, nia hato’o.
Ministra Edukasaun, Dulce de Jesus, hateten destakamentu ne’e depende ba manorin ne’e liu iha dixiplina ne’ebé no bainhira nia teste mak la liu depende ba nia konxiénsia, bainhira ministériu halo xamada ba nia no aseita maka koloka bá.
Nia esplika katak kona-ba subsídiu ba manorin sira iha área remota kontinua selu, maibé dalaruma depende ba alokasaun orsamentu husi saláriu no vensimentu.
“Loos duni, balun akontese seidauk selu tanba depende ba alokasaun. Ministériu halo pedidu ba nesesidade sira ne’e hotu, maibé dalaruma orsamentu simu la to’o, entaun jere tuir regra no orsamentu ne’ebé iha’’, realsa.
Notísia relevante: https://tatoli.tl/2024/08/02/me-hahu-define-destakamentu-profesor-ba-munisipiu/
Jornalista: Nelson de Sousa
Editora: Maria Auxiliadora
