DILI 11 Fevereiru 2026 (TATOLI)—Ministériu Interiór (MI) daudaun ne’e hahú fihir figura husi Ofisiál Polísia Nasionál Timor-Leste (PNTL) na’in-haat hodi okupa kargu Komandante Jerál no Segundu Komandante Jerál.
“Iha ona daudaun halo ona selesaun ba sira, selesaun hotu depois ha’u sei lori mai Konsellu Ministru para husu aprovasaun,” Ministru Interiór, Francisco da Costa Guterres, hato’o ba Jornalista sira iha Palásiu Governu, Kuarta ne’e.
Maski nune’e, Ministru seidauk bele fó sai naran maibé halo ona selesaun ba naran haat ne’ebé sei okupa kargu.
“Ami sei halo hela ne’ebé ha’u seidauk bele ko’alia, mais prosesu la’o hela, depois to’o tempu sei lori mai Konsellu Ministru, Primeiru-Ministru aprova ona mak ha’u informa hela ba ita-boot sira,” nia akresenta.
Notísia relevante : MI no Komandu Jerál PNTL hahú Janeiru diskute nomeasaun ba Komandante Jerál foun
Governante ne’e garante iha ofisiál superiór balun mak iha kapasidade atu okupa vaga ne’e.
“Ha’u fiar katak sira sei bele, sé de’it mak sei monu iha ne’ebá hetan nomeasaun, hetan hili ha’u fiar katak sei lori instituisaun ne’e di’ak ba oin,” nia subliña.
Tuir informasaun ne’ebé Ajénsia TATOLI asesu, iha pakote rua mak daudaun Komandu PNTL prepara ona atu asume kargu ba períodu 2026-2029, pakote ida mak hanesan Superintendente Xefe Polísia Afonso dos Santos nu’udar Komandante Jerál no ba kargu Segundu Komandante Jerál PNTL okupa husi Superintendente Xefe Polísia Justinho Menezes.
Enkuantu pakote daruak mak Superintendente Xefe Polísia Jorge Monteiro sei okupa ba kargu Komandante Jerál PNTL no nia Segundu Komandante Jerál PNTL mak Superintendente Xefe Polísia Orlando Gomes.
Proposta ba kandidatu Komandante Jerál PNTL 2026-2029 ne’e daudaun ne’e Gabinete Komandu Jerál PNTL submete ona ba Ministru Interiór, Francisco da Costa Guterres.
Aleinde ne’e, iha Fevereiru nia laran Governu liuhusi MI sei halo promosaun deviza ba ofisiál sira.
“Daudaun haree hela nia justifikasaun hotu, haree hela ninian modelu ba promosaun, pois ami sei halo promosaun ba sira,” Ministru Monteiro katak.
Governante ne’e hatutan, nia parte simu ona lista atu halo promosaun deviza ba hirak ne’ebé seidauk promovidu.
“Ne’e prátikamente barak, hamutuk 50-ital pesoas ita haree took depois ita sei anúnsia,” nia tenik.
Jornalista : Natalino Costa
Editora : Julia Chatarina
