DILI, 27 Fevereiru 2026 (TATOLI)—Ministru Asuntu Kombatente Libertasaun Nasionál, Gil da Costa Monteiro “Oan-Soru”, hateten Governu prevee rihun $150 ba komemorasaun Loron Nasionál Veteranu ba dala-IX (03/03/2017-03/03/2026).
Hosi rihun $150.000 ne’e ba nasionál aloka rihun $120 no rihun $30 ba munisípiu 12 la inklui Oekusi. Oekusi iha nia orsamentu ketak no kada munisípiu hetan $2.500.
Nia esplika orsamentu ba nasionál boot tanba realiza atividade tolu mak sertame, espozisaun depoiz reflesaun. Kona-ba atividade iha munisípiu sira-ne’e Konsellu Kombatente Libertasaun Nasionál sira mak hatene.
Tema ba Loron Nasionál Veteranu ba tinan ida-ne’e mak: “Unidade Diversidade ho nia Sentidu Patriotizmu”. Signifika katak “Ita bele namkari iha diferente kultura liliu polítika maibé sentidu ba nasaun ne’e ida de’it”.
“Prosesu preparasaun ba komemorasaun Loron Nasionál Veteranu hahú ona iha fulan kotuk. Serimónia sei hala’o iha Konsellu Kombatente Libertasaun Nasionál nia edifísiu nian. Maibé bá-oin ne’e protokolu hosi Palásiu Prezidensiál nian sei mai partisipa enkontru tuirmai ligadu ba preparasaun tanba Prezidente Repúblika sei partisipa iha eventu ne’e,” Oan-Soru dehan iha Komoro, Dili, Segunda (23/06).
Governu estabelese Dekretu-Lei Nú. 3/2016, ne’ebé Estadu Timor-Leste konsagra loron 03 Marsu nu’udar Loron Nasionál ba veteranu sira.
Estadu deside loron 03 Marsu ne’e sai Loron Nasionál Veteranu tanba iha loron 03 Marsu 1981, Timor-Leste hahú reorganiza funu ba libertasaun nasional, hafoin baze-de-apoiu rahun.
Data istórika ne’e liga ba Konferénsia Nasionál FRETILIN iha Maubai (Vikeke) no iha loron 03 Marsu ho orientasaun hosi membru Comité Central da FRETILIN (CCF) sobrevivente na’in-rua, Xanana Gusmão no Ma’Huno, no konferensista sira hili membru CCF na’in-sia (9) foun tan no foti desizaun importante lubuk ida, hodi libertasaun nasionál iha reorganiza luta territóriu tomak.
Hosi konferensia ida-ne’e mak rezisténsia armada moris filafali iha ai-laran no povu hetan fali nia esperansa no halo mundu hakfodak.
Selebrasaun dahuluk ba Loron Nasionál Veteranu ne’e, akontese iha tinan 2017. Veteranu no Kombatente Libertasaun Nasionál sira mak kompostu hosi frente armada, frente klandestina no frente esterna ka diplomátika.
Jornalista: Osória Marques
Editór: Xisto Freitas da Piedade
