Governu aprova subvensaun millaun $15 ba Konferénsia Episkopál Timorense

Governu liuhusi Primeiru-Ministru, Kay Rala Xanana Gusmão, no Gabinete Apoiu Sosiedade Sivíl (GASC) hamutuk ho Prezidente Konferénsia Episkopál Timorense (CET) husi Dioseze Dili, Baukau no Maliana halo inaugurasaun ba edifísiu foun Konferénsia Superiór Maiór Timor-Leste (CSM-TL, sigla portugés) iha Manleuana, Postu Administrativu Dom Aleixo, Munisípiu Dili. Imajen/Mídia PM.

DILI, 25 Marsu 2026 (TATOLI)—Governu liuhusi reuniian Konsellu-Ministru, kuarta ne’e, aprova subvensaun millaun $15 ba Konferénsia Episkopál Timorense (CET).

Proposta ne’e aprezenta husi Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, iha reuniaun Konsellu Ministru, ne’ebé hala’o iha Palásiu Governu, kuarta (25/03) ne’e.

Bazeia ba dokumentu ofisiál ne’ebé Agência Tatoli asesu katak subvensaun anuál ba Konferénsia Episkopál Timorense ne’e hala’o tuir akordu ne’ebé asina iha loron 14 fulan-Agostu tinan 2015 entre Timor-Leste no Santa Sé.

Inklui mós akordu-kuadru ne’ebé asina iha loron 16 fulan-Juñu tinan 2017 entre Governu no CET, ne’ebé prevee kontribuisaun anuál, tuir disponibilidade finanseira Governu nian, ba atividade sira ho karater sosiál, edukativu no Governu ekleziál igreja katólika nian.

Iha biban ne’e mós Governu delibera no hodi autoriza despeza ne’ebé aprezenta husi Ministru Transporte Komunikasaun, Miguel Gonçalves Manetelu ho montante $13.786.887,95 ba projetu reabilitasaun terminal Aeroportu Internasionál Prezidente Nicolau Lobato, relasiona ho parte kustu ne’ebé Timor-Leste sei suporta no projetu ne’e finansia hamutuk ho Governu Japaun.

Jornalista : Alexandra da Costa

Editór : Cancio Ximenes