DILI, 25 Marsu 2026 (TATOLI)–Governu liuhusi reuniaun Konsellu Ministru (KM), Kuarta ne’e, nomea Komisáriu Asistente Afonso dos Santos no Komisária Asistente Natercia Eufrásia Martins lidera Polísia Nasionál Timor-Leste (PNTL).
Ministru Interiór Francisco da Costa Guterres, hateten, Governu fó konfiansa absoluta ba pesoál rua ne’e hodi lidera instituisaun seguransa.
“Ohin deside ona nomea Komisáriu Asistente Afonso dos Santos hanesan Komandante Jerál, nomea Komisária Asistente Natercia Eufrasia Martins hanesan Segundu Komandante Jerál PNTL,” Ministru hato’o ba Jornalista sira, hafoin reuniaun ezekutivu iha Palásiu Governu, Kuarta ne’e.
Ministru dehan, Governu laiha dúvida ho lideransa Afonso no Natércia tanba hatudu ona iha Komandu PNTL.
“Depoizde ha’u serbisu ho PNTL durante tinan-rua ho balun, haree sira-nia avaliasaun tomak, haree buat barak katak sira na’in-rua kompleta malu, ida orsida haree liu ba kestaun operasionál, ida mai para atu reforma institusionál,” nia akresenta.
Governante ne’e mós nota katak pesoál ruane’e iha ona esperiénsia barak iha Komandu.
“Komandante Afonso sei haree liu ba kestaun operasionál, operasaun espesiál, polisiamentu komunitária no Komisária Asistente Natercia haree liu ba reforma institusionál, kestaun halo reforma, diagnóstika ne’ebé mak forti ba Polísia atu hadi’a no hatene problema loloos Polísia para ita kurize, ita atu hadi’a buat hotu. Ida-ne’e mak ita foti na’in-rua ne’ebé di’ak para reforma totál Polísia, ita atu hadi’a di’ak liután Polísia atu nune’e halo serbisu di’ak liután,” nia katak.
Notísia relevante : Komisáriu Asistente Afonso dos Santos prontu serví PNTL
Tanba ne’e, Komandante Jerál ne’e sei foku liu ona ba kestaun operasionál, enkuantu Segundu Komandante Jerál fó kedan serbisu ba kestaun Lojístika, Administrativu, Planeamentu, kestaun diagnóstiku, kestaun disiplina, halo inspesaun uzu administrativu Polísia nia sasán, inspesaun jerál hodi hareee mós inspesaun Polísia la’o loos ka lae no halo tuir disiplina ka lae.
“Ida-ne’e mak ita fó serbisu ba Segundu Komandante Jerál PNTL. Na’in-rua ne’e ho Komisáriu Asistente sei laiha promosaun ba Komisáriu Jerál, tanba sira foin maka sa’e foin daudaun ne’e, prosesu ne’e ita la’o neneik,” nia tenik.
Ministru esplika, ne’e hanesan nomeasaun polítika husi Governu. Tuir artigu 47 no 48 husi Estatutu Pesoál PNTL nomeasaun ba Komisáriu PNTL ne’e ho deviza Komisáriu Asistente no Segundu Komandante Jerál bele okupa husi postu Superintendente Xefe Polísia ne’ebé bele promove ba Komisáriu Asistente, maibé Governu nomea kedan Komisáriu Asistente entaun la nesesáriu atu halo promosaun.
“Sira na’in-rua ne’e ho nomeasaun ba mandatu tinan-tolu husi 2026 to’o 2029,” nia katak.
Jornalista : Natalino Costa
Editora : Julia Chatarina
