VIKEKE, 27 Marsu 2026 (TATOLI)—Prezidente Autoridade Munisípiu (PAM) Vikeke, Francisco C. S. de Gonzaga Soares, hamutuk ho Servisu Edukasaun Munisipál (SME) lansa ona programa merenda eskolár (PME) iha Ensinu Báziku Filiál (EBF) Assalaitula, Suku Builale, Postu Administrativu Ossú.
Hafoin lansamentu, PAM Francisco C. S. de Gonzaga Soares, husu eskola sira-ne’ebé implementa programa merenda eskolár atu kontinua mantein implementa tuir menu eskolár nian, atu estuante sira sai forte no matenek.
“Ita-nia hahán iha-ne’e mesak di’ak no kualidade kapa’as. Maibé, ida-ne’e labele muda tan menu. Kontinua mantein menu PME nian,” nia hateten iha serimónia lansamentu PME, iha EBF Assalaitula, Sesta ne’e.
Líder másimu Munisípiu Vikeke ne’e husu ba autoridade relevante hanesan edukasaun, superintendente, siguransa alimentár, saúde, fiskalizasaun, diretór eskola, lideransa komunitária inklui inan-aman sira atu kontinua halo kontrolu ka monitoriza implementasaun programa merenda eskolár.
Iha fatin hanesan, Diretór SME Vikeke, Antônio da Silva Pinto hateten implementasaun PME tarde tanba iha mudansa estrutura, tan ne’e implika ba programa ne’e iha Munisípiu Vikeke.
“Ami asina ona orsamentu iha banku no aloka ona bá eskola sira hodi implemeta programa merenda eskolár. Nune’e, ita hahú halo lansamentu PME iha EBF Assalaitula,” nia haktuir.
Nia relata programa merenda eskolár ba implementasaun anu letivu 2026 sei implementa ho durasaun loron efetivu hanesan: ba Ensinu Báziku Sentrál (EBC-sigla portugeza) loron 123 no Ensinu Pré-Eskolár (EPE) loron efetivu hamutuk 136. Orsamentu ba programa merenda eskolár hamutuk millaun $1.071.231,00.
Nune’e, EBF Assalaitula estudante ne’ebé sai benefisiáriu hamutuk 145, kompostu husi mane na’in- 76, feto na’in- 69.
Enkuantu, tuir dadus, eskola sira-ne’ebé iha Munisipiu Vikeke sai benefísiáriu ba PME kompostu husi Ensinu Báziku Sentrál (EBC-sigla portugeza) hamutuk 18, EBF 77 no Ensinu Pré-Eskolár (EPE) hamutuk 32, ho totál estudante benefisiáriu programa ne’e hamutuk na’in-20.487.
Partisipa iha lansamentu PME ne’e kompostu husi servisu edukasaun Munisípiu Vikeke, autoridade lokál, Polísia Eskuadra Postu Ossú, profesór no hetan partisipa másima husi estudante EBF Assalaitula.
Jornalista: Vitorino Lopes da Costa
Editór: Xisto Freitas da Piedade
