DILI, 27 Marsu 2026 (TATOLI)–Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, hakarak atu hasa’e profisionalizmu instituisaun durante nia mandatu tinan-tolu.
“Entre ami-nia prioridade estrátéjika sira, ami hatudu dahuluk atu hasa’e profisionalizmu no disiplina instituisaun nian liuhusi formasaun kontinuu, promove étika no integridade, no hasoru irarkia ho forma indisplina iha PNTL,” Komisáriu Asistente Afonso hato’o durante diskursu iha ámbitu aniversáriu PNTL ba dala-XXVI, ne’ebé hala’o iha Palásiu Governu, Sesta ne’e.
Nia dehan, planu daruak mak modernizasaun instituisaun ho investimentu teknolojia, hasa’e investigasaun krime no dezenvolvimentu kapasidade espesífika hanesan krime transnasionál, ne’ebé sai ameasa boot.
Planu datoluk atu hasa’e Polísia aprosimasaun, promove relasaun konfiansa ho komunidade ne’ebé importante tebes ba prevensaun krime no estabilidade sosiál.
Notísia relevante : Xanana husu PNTL garante pás no estabilidade iha TL
Seluk, hakarak hasa’e koordenasaun entre instituisaun, hasa’e liután relasaun ho FALINTIL-Forsa Defeza Timor-Leste (F-FDTL), Ministériu Públiku (MP), Polísia Sientífika Investigasaun Kriminál (PCIC) no Servisu Intelijénsia Estadu nian atu nune’e bele iha resposta integradu no efikáz ba ameasa seguransa nasionál.
“PNTL tenke assgura artikula efikáz no permanente ho servisu Estadu hotu, promove koordenasaun instituisaun ne’ebé forte atubele iha resposta integradu ba dezafiu seguransa nasionál nian. Ami-nia misaun mak asegura implementasaun polítika Governu iha área seguransa, garante seguransa internu, orden públiku no protasaun ba sidadaun hotu, laiha diskrimisnasaun. Prinsípiu universál ida-ne’e mak orienta Forsa Polísia modernu no profisionál sira,” nia akresenta.
Komandante Jerál PNTL komprometidu, hamutuk ho Komisária Natércia sei asume responsabilidade ho firme atu kontinua prosesu konstrusaun PNTL ne’ebé forte liu, profisionál, orientadu ba rezultadu, no bele responde ba dezafiu atuál no futuru seguransa nasionál.
“Iha tempu hanesan, ami tenke dehan ho responsabilidade, katak interrese superiór seguransa Estadu nian tenke prevalese liu ba interrese instituisaun ka setorial, orienta ami-nia atuasaun ho prinsípiu interrese nasionál,” nia katak.
Nia dehan, iha planu rejionál no internasionál, nu’udar Komandante Jerál no Segundu Komandante Jerál atu kontinua hasa’e kooperasaun ho parseiru sira hanesan iha ASEANAPOL ASEAN nian, CPLP, TLPDP no organizasaun internasionál sira seluk, promove troka informasaun no hasa’e kapasidade instituisaun.
“ Ami asume kargu ida-ne’e ho hirus, maibé ho konsiénsia katak ami iha responsabilidade boot ne’ebé to’o mai iha ami-nia kaben, iha servisu ba Estadu no Povu Timor-Leste nian,” nia hato’o
Iha biban ne’e, Komandante Jerál haktuir katak istória PNTL nia naruk, komplexu, sakrifísiu no dezafiu boot. Husi tempu administrasaun tranzitória Nasaun Unida sob lideransa Superintendente Paulo de Fátima Martins to’o iha krize polítika, PNTL hatudu sira-nia kapasidade no adaptasaun.
Nia dehan, depois krize polítika, intervensaun Nasaun Unida nian filafali atu asume papel importante iha kontrolu no reorganizasaun Polísia iha kontestu Akordo Suplementar. Iha faze ida-ne’e difísil mai Komandante Longuinhos Monteiro nia lideransa, ho nia misaun klaru atu halo instituisaun ne’e forte liu no garante katak forsa Estadu no UNPOL Nasaun Unida bele serve malu ho di’ak.
Nune’e, iha tinan rua de’it, ho determinasaun no vizaun estratéjika, Komandante Longuinhos konsege konsolida no restrutura fali PNTL nia misaun prinsipál iha operasaun Polísia iha Timor-Leste. Nune’e, iha tinan 2012, sob lideransa ne’e, PNTL asume totalmente mandatu misaun Polísia nian, marka momentu istóriku ne’ebé kontribui ba Polítika Governu nian atu hasa’e misaun Nasaun Unida iha Timor-Leste.
“Ami, kuadru PNTL sira ne’ebé iha ne’e, hatene katak prosesu ne’e la’ós fásil, maibé prosesu ne’e susesu, rezultadu husi esforsu koletivu no kompromissu instituisaun nian lideradu husi Komandante Longuinhos,” Afonso katak.
Hafoin Komandante Jerál sira seluk kontinua prosesu ne’e, hanesan Komandante Júlio Hornai, Komandante Faustino no Komandante Henrique da Costa.
“Ida-idak iha sira-nia tempu, asumi responsabilidade fundamentál iha konstrusaun no konsolida PNTL to’o agora. Ba eis Komandante-Jerál hotu, ami fó ami-nia rekoñesimentu no agradesimentu boot ba imi-nia dedikasaun ba PNTL no ba seguransa,” nia hato’o.
Tanba ne’e, ho kargu ida-ne’e Afonso sei asume ho responsabilidade hodi serbí povu ho nasaun.
“Ami asumi agora, mai husi rezultadu direitu husi pasadu, ne’ebé ami nunka bele nega – pasadu ne’ebé halo ho sakrifísiu, dedikasaun no servisu ba nasaun,” nia afirma.
Komandante Jerál agradese ba Primeiru-Ministru nia hanoin ne’ebé hateten PNTL la’ós instrumentu polítiku.
“PNTL mak instituisaun Estadu ne’ebé la partisanu, iha servisu ba Konstituisaun no lei iha área seguransa nian,” Afonso tenik.
Jornalista : Natalino Costa
Editora : Julia Chatarina
