DILI, 27 Marsu 2026 (TATOLI)—Primeiru-Ministru, Kay Rala Xanana Gusmão, husu ba Polísia Nasionál Timor-Leste (PNTL) iha ámbitu komenorasaun aniversáriu PNTL ba da-26, atu prepara-an ho didi’ak no komprometidu kontinua garante pás no estabilidade iha Timor-Leste.
Xefe Governu hato’o parabéns ba PNTL ba servisu ne’ebé di’ak husi Komandate Jerál sesante, Henrique da Costa, no Segundu Komandante sesante PNTL, Pedro Belo, ne’ebé sei iha kompeténsia haree kona-ba seguransa no kooperasaun internasionál no inkluzaun iha ASEAN, maibé parabéns mós ba Komandate Jerál foun, Afonso dos Santos, no Segundu Komandante PNTL, Natércia Martins.
“Ohin, ita rona husi Komandante Jerál atuál PNTL ho reflesaun ida husi kedas bainhira PNTL hahú ezisténsia to’o ohin loron. Nune’e, presta omenajen mós ba komandante PNTL sira-ne’ebé dedika sira-nia servisu mak ohin loron ita hotu bele hamri’ik iha ne’e,” Primeiru-Ministru deklara iha ninia diskursu iha ámbitu komemorasaun loron aniversáriu PNTL ba da-26 iha Palásiu Governu, ohin.
PM Xanana dehan, tinan ida-ne’e mós Timor-Leste sei restaura ninia independénsia ba da-24, signifika ida-ne’e kaer rasik kuda talin, sai husi konflitu ne’ebé naruk tebes durante tinan 24, to’o TL hetan tiha ukun-an no tinan ida-ne’e apropriadu tebes iha oportunidade atu halo reflesaun ida kona-ba 2002 to’o 2026.
Tanba ne’e, nia husu ba PNTL atu hadi’a no reforsa tan iha sira-nia servisu, entaun buka atu deskobre saida mak halo di’ak no saida mak halo ladi’ak, atu bele konsolida Estadu direitu demokrátiku ida-ne’e.
“Ita hotu asume kompromisu katak ita tenke hadi’ak di’ak liután, tanba ne’e mak husu ba Komandate Jerál atu tuir de’it saida mak ita boot nia vizaun, buka atu halo koordenasaun ne’ebé di’ak liu iha setór hotu-hotu,” nia dehan.
Hanesan situasaun agora akontese funu iha médiu oriente, lahatene bainhira mak atu ramata no ninia impaktu ne’e sente la todan liu ho nasaun selu, maibé problema sei kontinu. Ne’eduni PNTL tenke prepara-an hodi asegura estabilidade iha Timor-Leste.
Maibé, nia dehan, bainhira Timor-Leste la preparadu mak problema bele mosu, tanba PNTL mak ajente seguransa ba rai ida-ne’e.
“Husi ajente PNTL nia atuasaun ne’e sei netrál no independente, atu ema hotu bele fiar imi,” nia dehan.
Jornalista : Alexandra da Costa
Editór : Cancio Ximenes
