DILI, 27 Marsu 2026 (TATOLI)-Parlamentu Nasionál iha esperansa katak lideransa foun Polísia Nasionál Timor-Leste (PNTL), Komandante Jerál PNTL, Afonso dos Santos, no Segundu Komandante Natércia Martins, bele kontinua halo prosesu institusionalizasaun hodi halo PNTL sai profisionál, nune’e bele serbí povu no nasaun ho di’ak liután.
Deputadu husi Partidu Frente Revolusionária Timor-Leste Independete (FRETILIN), David Dias Ximenes ‘Mandati, husu ba lideransa foun atu kontinua programa di’ak sira ne’ebé sesante sira halo ona no hadi’a buat sira ne’ebé seidauk di’ak. Nia afirma liuliu kona-ba presiza aumenta vizibilidade polísia iha públiku hodi prevene konflitu.
Membru Komisaun B ne’ebé trata Asuntu Negósiu Estranjeiru, Defeza no Seguransa, solisita mós atu kria kondisaun di’ak ba polísia sira iha liña fronteira hodi kontrola movimentu kontrabandu sira. Nia destaka mós importánisia rotasaun ba membru polísia sira iha área referida.
“Esperansa ba komisáriu foun, tuir loloos ohin iha nia diskursu ko’alia kona-ba ninia misaun, ne’e mak ita dezenvolve”, nia hateten hafoin partisipa komemorasaun aniversáriu PNTL ba da-26 no serimónia pose ba líder másimu instituisaun ne’e, iha Palásiu Governu, ohin.
Deputadu husi Kongresu Nasionál Rekonstrusaun Timorense (CNRT, sigla portugés), Natalino dos Santos, parabeniza instituisaun PNTL ba aniversáriu no ba lideransa foun. Nia espera katak xefia foun sir abele institusionaliza PNTL, sai forte no profisionál nune’e garante seguransa interna.
“Liuliu atu konsolida instituisionál, presiza kapasitasaun ida intensive ba téknika espesializada iha unidade hothotu, tenke iha kapasidade hanesan polísia hodi halo atuasaun tuir sira-nia knaar, reforsa fasilidade hodi halo serbisu ho di’ak, tuir espetativa povu nian atu garante orden no lei”, nia hato’o.
Notísia relevante: https://tatoli.tl/2026/03/27/xanana-husu-pntl-garante-pas-no-estabilidade-iha-tl/
Jornalista: Nelson de Sousa
Editora: Maria Auxiliadora
