BOBONARU,08 Abríl 2026 (TATOLI)— Komunidade no Autoridade lokàl sira preukupa ho implementasaun projetu estrada rurál pakote rua ne’ebe la’o atraza no laiha progresu fizíku iha suku Meligu, Postu Administrativu Kailaku, Munisípiu Bobonaru.
Xefe suku Meligo, Duarte Soares, haktuir obra ne’e implementa iha tinan 2024, trosu ida de’it liga husi sede suku Meligu sa’e ba to’o aldeia Berleu no Liabote ho totál pakote tolu, maibé pakote ida ne’ebé responsabiliza husi kompaña Lesuboro Unipesoál Lda ne’e finaliza ona, enkuantu pakote rua seluk ne’ebé implementa hosi kompaña Mar-Vermelho Unip Lda no Afnadan Unip Lda laiha progresu no paradu kleur ona.
Notísia Relevante:Kompañia tolu sei reabilita estrada rurál kilómetru neen iha Meligo
“Iha kompaña rua mak abandona hela projetu implementasaun iha ha’u nia suku, aldeia Berleu, ha’u nu’udar lideransa komunitáriu ho ha’u nia komunidade sira preukupa los, tanba estadu fakar osan lubuk ida ona, maibé realidade kompaña sira la halo tuir kontratu ne’ebe asina ho estadu,” nia informa ba jornalista sira, iha edifísiu Admistrasaun Postu Kailaku, Kuarta ne’e hafoin akompaña Prezidente Repúblika, José Ramos Horta liu iha lokál projetu ne’ebe abandona ne’e.
Alende abandona, Duarte salienta tan katak to’o agora kompaña rua refere seidauk selu direitu trabaladór sira nia.
Duarte relata, problema ne’e lider komunitária no Autoridade Postu Administrativu Kailaku aprezenta ona ba ekipa Obras Públika destakadu Munisípiu Bobonaru no nasionàl atu solusiona.
“Se bele kompaña ne’e labele kontinua ho obra ne’e karik, hapara ona no intrega fali ba kompaña seluk para kontinua obra ne’e, para ha’u ho ha’u nia komunidade bele halo viajen ba mai,” nia afirma.
Notísia Relevante:MOP fó xamada dala-rua ba empreza Mar Vermelho ne’ebé abandona projetu
Iha biban ne’e, Administradór Postu Administrativu Kailaku, Rodolfo da Cruz, reforsa to’o agora laiha informasaun husi kompaña rua konabá servisu paradu ne’e.
Ema numeru primeiru iha Autoridade Postu Administrativu Kailaku ne’e lamenta ho atrazu servisu ne’e tanba lokál projetu besik kedas materiál lokál hanesan fatuk ho rai-henek no fasíl atu halo mobilizasaun.
“Projetu hotu-hotu iha Munisípiu Bobonaru sempre mai foti rai-henek iha Kailaku, tanba kualidade di’ak no besik hela, mais ha’u la hatene kompaña sira ne’e nia konsiensia ne’e iha ne’ebé, ami tenta halo komunikasaun mais la marka prezensa iha momentu ita atu rezolve ne’e,” Rodolfo afirma.
Lider masimu iha Autoridade Postu Administrativu Kailaku ne’e, ezije ba Ministériu Obras Públika atu fó karta xamanda ba kompaña rua ne’e hodi bele kontinua responsabiliza obra referida, tanba povu hein kleur ona no hakarak tebes atu senti dezenvolvimentu infraestrutura bazíku.
Nia argumenta estrada rurál ne’e trosu importante tebes tanba liga kedas ba fatin deskobrimentu Fosíl Repetus Marinu iktiosauru lokalizadu iha foho Lesululi ne’ebé iha futuru sei atrai sentista no vizitante barak husi rai-liur.
“Ita hakarak komunidade tantu husi nasionál no Munisípiu tenke asesu no fasilita sientista sira atu bele ba to’o fatin fosíl ne’ebé ita deskobre ne’e, se agora cor tia sorin, depo’is sorin husik hela, fatuk mak tau iha leten, ohin ami ho Prezidente Repúblika sa’e ba haree direita kondisaun estrada ne’e grave teb-tebes, a’at liu tan fali hanesan bai-bain,” nia dehan.
Enkuantu obra ne’e Kompañia Lesuburo Unip Lda ezekuta ho distansia killmetru tolu no orsamentu rihun $339-resin, Marvermelho ho distasia kilometru 1,5 ho orsamentu rihun $234 no Afanada JV ho Menu-bein ezekuta ho distansia kilometru 2,80 ho kustu $298,719,26.
Jornalista : Sergio da Cruz
Editora : Armandina Moniz
