BOBONARO, 14 agostu 2024 (TATOLI)-Diresaun Obra Públika Munisípiu Bobonaro ho enjeñeiru destakadu hosi Ministériu Obras Públika, kuarta ne’e halo enkontru ho líder komunitária, komunidade no kompañia lokál tolu ne’ebé sei implementa projetu F4D reabilitasaun estrada rurál ho distánsia kilómetru neen-resin iha suku Meligo, postu administrativu Cailaco.
Enkontru ne’e atu ko’alia kona-bá ekipamentu sira ne’ebé utiliza ba salvaguarda traballadór no salvaguarda ambiente.
Kompañia tolu ne’ebé sei responsabiliza projetu ne’e hanesan Lesuboro Unip Lda ezekuta ho distánsia kilómetru tolu, Mar Vermelho distánsia 1,5, Apanada Join Venture ho distánsia kilómetru 2,80 no estrada ne’e sei kobre aldeia rua hanesan Liabote ho Berleu.
Reprezentante Administradór Postu administrativu Cailaco, Almeida Soares, agradese ba governu ne’ebé tau ona prioridade atu halo reabilitasaun ba estrada rurál iha suku Meligo hodi fasilita movimentasaun komunidade nian.
“Timor ne’e postu barak, Bobonaro iha suku 50, maibé ita orgulu tanba tinan ne’e ita hetan projetu haat kedas,.ne’e ita bele konsidera kategoria luar biasa,” nia hateten iha Meligo.
Nia husu ba kompañia implementadór atu ezekuta serbisu ho responsabilidade nune’e bele finaliza ho di’ak no kualidade atubele uza ba tempu naruk.
“Kompania tenke respeita tempu, tanba iha kuadru avizu ne’e durasaun tempu ne’e iha, dalaruma durasaun tempu tinan ida, maibé tinan tolu seiduak hotu hela deit, ne’e ladún diak,” nia fó hanoin.
Diretór Kompañiaa Lesuburo Unipesoál Lda, António Lelo Tasi, promete ezekuta obra ne’e ho kualidade tuir kontratu ne’ebé selebra ho governu.
“Ami atu implementa projetu ne’e, saida mak la kualidade ita hotu kontrola, la’ós ami de’it no tékniku sira husi Obra Públika, ha’u husu badaen sira iha suku ne’e atu koopera malu,” nia hateten.
Obra ne’e Kompañia Lesuburo Unip Lda sei ezekuta ho orsamentu rihun $339-resin, Marvermelho ho orsamentu rihun $234 no Afanada JV ho Menu-bein ezekuta ho kustu $298,719,26.
Jornalista: Sérgio da Cruz
Editór: Evaristo Soares Martins
