DILI, 19 Abríl 2026 (TATOLI) –Fisheries Liaison Officer ka Ofisiál Ligasaun ho Peska husi Empreza ENI, Galiano Waidau, haktuir, durante halo serbisu peskiza iha tasi kona-ba sísmiku nian dezde 06 Abríl to’o horseik konsege hetan ró 10 husi Indonézia halo peska ilegál iha Tasi Timor, iha área Vikeke.
Nia esplika, kona-ba atividade sísmiku ninian sira viajen ba kosta súl hahú iha loron 04 Abríl no to’o iha ne’ebá hahú serbisu atividade sísmiku iha loron 06 Abríl to’o agora.
“Ami mai iha ne’e semana rua ba tolu ona, ami mai halo survey ka atividade sísmiku ba riku -soin iha tasi -okos mak hetan ró sira halo atividade ilegál, tanba sira tama mai área survey nian, to’o horseik mós ami hetan tan ró ida tama mai area survey nian entaun ami hetan haruka sira sai tanba ró halo sísmiku ne’e uza kabel boot tama tasi okos entaun sira tenke sai tanba risku ida ba sira-nia vida”, Galiano Waidau, ba TATOLI via telefonika domingu ne’e.
Nia haktuir, ró ne’ebé sira hetan ne’e, ró ne’ebé halo atividade ilegál besik sira ne’e mak konta 10 maibé konta ró ne’ebé dook husi fatin sísmiku ne’e, konta la hotu tanba kada loron tama sai iha kosta súl ne’e barak.
Nia hateten, hafoin hetan ró ilegál, nia parte seidauk informa ba polísia tanba atividade ne’ebé sira halo ne’e Polísia laiha, maibé nia sempre post iha nia Facebook entaun ida-ne’e bele fasilita Unidade Polísia Marítima sira.
Tanba relasiona nia postajen iha semana ida liu ba Unidade Polísia Marrítima telefone nia halo liña koordenasaun konsege kaer ró peska ilegál ida. Maibé, ró ne’ebé sira kaer ne’e la’ós ró ne’ebé lorloron kaer ikan iha sira-nia parte hetan ne’e maibé husi parte seluk.
Nia subliña, kona-ba ró ne’ebé sira-nia parte hetan horseik ne’e hanoin Polísia Marrítima sira labele tama to’o mai iha ne’ebá tanba iha loos tasi kle’an liu ne’ebé susar tebes tama tanba Timor-Leste seidauk iha ró ne’ebé sufisiente halo patrollamentu tama to’o tasi kle’an.
“Ha’u hanoin ho situasaun sira hanesan Governu mós hanoin ona halo investimentu ba iha ró patrollamentu ba Polísia Marrítima no Komponente Naval nune’e bele halo kontrolu ba ita-nia rikusoin tasi ninia”,
Relasiona ho asuntu ne’e Agência TATOLI halo komfirmasaun ho Komandante Destakamentu Unidade Polísia Marrítima iha postu Com Superintendente Asistente João Sanches, katak sira-nia parte seidauk rona informasaun kona-ba ró ilegál foun ne’e maibé ho informasaun ne’ebé sira-nia parte rona ona husi mídia ne’e sei hasoru no fasilita sira-nia serbisu iha terrenu.
Notísia relevante:Komandu Munisípiu Lautein aprezenta tripulante 32 halo peska ilegál ba MP Baukau
Jornalista: Arminda Fonseca
Editór: Rafael Ximenes de A. Belo
