BAUKAU, 21 Abríl 2026 (TATOLI)—Igreja Katólika liuhusi Padre Adérito Victor da Costa, SDB, husu entidade hotu-hotu kontinua serbisu hamutuk dezenvolve Munisípiu Baukau.
Vigáriu Asuntu Parokiál Katedrál Dioseze Baukau ne’e rekoñese bainhira Baukau funda iha tempu kolonializmu Portugés maibé fundadór Baukau-oan sira iha tempu ne’ebá matenek nune’e husu atu Baukau-oan kontinua obra ne’ebé husik hela iha tinan 167 liubá.
“Ita hotu tenke serbisu hamutuk kontribui ba ita-nia rai ida-ne’e. Ne’e importante hahú husi nivel hotu-hotu,” Padre Adérito Victor hateten bainhira selebra misa agradesimentu loron fundasaun Baukau iha Igreja Katedrál Vila Antiga, Segunda ne’e.
Nu’udár Baukau-oan, Padre Adérito relata, Baukau nia ema di’ak no matenek barak maibé presiza hasa’e responsabilidade no sai misionáriu hodi kontinua haklaken hanoin di’ak ba jerasaun foun sira hodi dezenvolve Munisípiu Baukau iha futuru.
Notísia relevante: AMB selebra loron fundasaun Baukau ba da-167
Aleinde ne’e, presiza hadi’a an no rekoñese fallansu iha idaidak nian an, institusaun no komún liuliu unidade ho hanoin no laran ida nune’e hakat bá-oin hanesan kria pás no estabilidade.
“Nafatin aprende kada loron atu ita bele moris loloos no partisipa iha dezenvolvimentu,” Padre Adérito akresenta.
Entretantu, Munisípiu Baukau funda iha loron 20 Abríl tinan 1859 iha-ne’ebé horisehik, 20 Abríl, Autoridade Munisipál Baukau (AMB) hamutuk ho autoridade sivíl no militár, líder komunitáriu inklui komunidade selebra loron fundasaun ba da-167.
Iha elebrasaun referida, hala’o ho sekuénsia programa hanesan misa agradesementu, semináriu reflesaun ho tema ‘O Nosso Orgulho, A Nossa Casa’, konvoi husi vila antiga ba resintu Administrasaun Munisipál Vila Nova, doasaun ran no palku animasaun ne’ebé partisipa husi dirijente serbisu munisipál, administradór postu administrativu, xefe suku, Kamara Komérsiu Indústria Timor-Leste (CCI-TL), veteranu no komunidade.
Jornalista: Natalino Belo
Editór: Xisto Freitas da Piedade
