DILI, 21 Abríl 2027 (TATOLI)—Família Saudozu Ministru Ensinu Superiór, Siénsia no Kultura, José Honório da Costa Pereira Jerónimo, sente lakon no la espera ida-ne’e bele akontese ba família.
“Nu’udár maun sente triste tanba ami ki’ak, ami hela mane na’in-haat no feton na’in-rua. Ha’u nu’udár aman ida ba sira sente lakon no ida-ne’e la espera. Maibé ida-ne’e Maromak nia planu no ami labele kontra Maromak,” Saudozu nia maun, Eis Ministru Asuntu Parlamentár no Komunikasaun Sosiál, Francisco Jerónimo hateten ba TATOLI iha Mortuáriu, Ospitál Nasionál Guido Valadares (HNGV-sigla portugeza), Tersa ne’e.
Francisco Jerónimo konta tuir katak nia alin sempre hameno ba governante ne’e bainhira fila husi tratamentu saúde iha Malázia no Jakarta karik presiza deskansa uitoan.
“Maibé, buat ida-ne’ebé nia sempre dehan mai ha’u mak reponsabilidade iha ita-nia kabaas, ne’ebé ita tenke hala’o. Ema fó fiar, nasaun fó fiar kaer ukun mak tenke iha responsabilidade. Tanba ne’e, haú dehan loos duni maibé saúde mós importante,” nia haktuir.
Notísia relevante:“Ministru José Honório to’o iha HNGV ho kondisaun iis laiha ona”
Antes lori Saudozu bá nia moris fatin iha Likisá, família ho líder Partidu Demokrátiku (PD) hamutuk ho família lori Saudozu vizita ikus ba nia ministériu no sede PD nian.
“Daudaun ne’e, família hahú prepara oinsá lori vizita ba nia Ministériu Ensinu Superiór, Siénsia no Kultura, kontinua ba nia sede tanba nia partidu polítiku nia ema no ikus mak ba nia rai Likisá,” Francisco informa.
Saudozu nia maun hateten família ho líder PD iha-ne’e hamutuk husu de’it ezame esternál ida para hatene nia kauza hosi mate, nune’e labele mosu intendimentu ne’ebé lahanesan iha públiku.
Kona-ba fúnebre, nia dehan, seidauk bele deside tanba presiza envolve família no maun-alin iha Likisá hodi deside oráriu.
Enkuantu, Xefe Gabinete MESSK, José Boavida Ximenes, hateten Ministru José Honório ataka iha nia servisu fatin no monu iha nia hariis-fatin oin, purvolta tuku 12:00 Otl no hakotu-iis besik tuku 13:00.
“Ami kontaktu ba ambulánsia maibé tarde uitoan entaun ami uza karreta Estadu ne’ebé Saudozu uza ne’e hodi tula ba emerjénsia maibé labele salva nia vida,” nia haktuir.
Xefe Gabinete tenik iha fulan kotuk Saudozu hala’o tratamentu saúde iha Malázia tanba moras fuan no nia konsume hela ai-moruk.
Perfíl no jornada moris Ministru José Honorio
José Honório da Costa Pereira Jerónimo, SE. M.Si, moris Iha Bazartete iha loron 15 Fulan-Fevereir 1973, Munisípiu Likisá, oan husi David Pereira Jerónimo no Adelina da Costa.
Hahú frekuenta Ensinu Báziku iha SDN 02 Mauboke-Likisá no ramata iha 1986. Depoiz kontinua iha Ensinu Pre-sekundária SMPN 01 Likisá no ramata iha tinan 1989, kontinua iha Ensinu Sekundária SMAN 02 Dili maibé tanba situasaun polítika iha tempu ne’ebá la permite entaun muda fali ba eskola iha Ensinu Sekundária SMA Kristal Likisá no ramata iha tinan 1992.
Antes ba kontinua estudu iha nivel ensinu superiór sei envolve mós iha rede klandestina hanesan ativista iha Conselho Nacional da Resitência Timorense (CNRT) Sub-rejiaun Likisá iha tinan 1990 no tama ba kaixa klandestina 87 ne’ebé lidera husi señór Letomone iha Aipelu, Bazartete-Likisá, nune’e mós envolve iha organizasaun Fitun ne’ebé lidera husi Saudozu Armando da Silva hanesan membru iha tinan 1992.
Iha Tinan 1994, kontinua ba ensinu superiór iha Jember Indonézia-Java Leste (STIE), hola-parte iha organizasaun RENETIL hanesan membru juradu no kaer kna’ar hanesan ANAPOL (analiza Polítika) iha Nurep Buras Ba Nafatin Jember no IMPPETU hanesan membru. Tanba situasaun polítika iha tempu ne’ebá difísil no laiha ona kontaktu ho família entaun deside filamai Timor-Leste iha 1999 no konsege ho padre Yosep Daslan no kolega balun harii Eskola Sekundária Katólika São João de Brito iha Likisá hodi ajuda joven sira-ne’ebé atu tama ensinu sesundáriu.
Depoiz fila bá Indonézia iha tinan 2001 no ramata estudu iha nivel lisensiatura iha área ekonomia iha STIE (Sekolah Tinggi Ilmu Ekonomi) Jember. No iha tinan hanesan fila kedas mai Timor Leste hodi sai hanesan dosente UNTL iha Fakuldade Ekonomia, iha tinan 2004 hetan fiar hanesan Xefe Departamentu Siénsia Ekonomia iha Fakuldade Ekonomia-UNTL. Iha Tinan 2006-2008, hetan fiar hanesan dekadu Fakuldade Ekonomia-UNTL. Iha Tinan 2008-2010 bá kontinua estudu iha nivel mestradu iha Universitas Kristen Satya Wacana Indonesia.
Iha tinan 2010-2012, sai hanesan membru Konsellu Jerál UNTL nian reprezenta Fakuldade Ekonomia.
Iha tinan 2013, hetan fiar husi VI Governu Konstitusionál ba asumi kargu hanesan Adidu Komérsiu iha Embaixada Timor-Leste iha Jakarta to’o tinan 2015. Iha tinan 2016 to’o tinan 2020 hanesan Vise Reitór Asuntu Administrasaun no Finansa UNTL. Iha Tinan 2021 to’o fulan-Juñu 2023 hanesan Pro Reitór Asuntu Auditoria UNTL. Iha fulan-Jullu 2023 to’o agora hetan konfiansa husi PM Xanana Gusmão hanesan Ministru Ensinu Superiór, Siénsia no Kultura.
Jornalista: Osória Marques
Editór: Xisto Freitas da Piedade
