DILI, 28 Abríl 2026 (TATOLI)–Xefe Estadu Maiór Jenerál Forsa Armada (XEMGFA), Tenente Jenerál Domingos Falur Rate Laek, sujere ba autór livru “Saya Mati untuk kemerdekaan”, Paulo Dias Quintas atu suspende nia distribuisaun livru.
“Nu’udar rekomendasaun adisionál no perentória, sujere ba autór no editora atu suspende temporáriamente promosaun ka distribuisaun obra ne’e to’o faktu sira ne’ebé kontesta hetan klarifikasaun husi entidade sira temi,” Tenente Jenerál Falur hateten liuhusi nota ne’ebé Ajénsia TATOLI asesu, Tersa ne’e.
Notísia relevante : “Imi tenke hakerek imi-nia istória hodi kontra istória ne’ebé Veríssimo nia oan hakerek”
Falur hateten, karik komprova duni iha manipulasaun, plájiu ka difamasaun, autór tenke husu atu publika errata, hasai trexu falsu sira ka iha últimu kazu, hasai obra husi sirkulasaun hodi salvaguarda direitu ba naran di’ak ema ne’ebé hetan akuzasaun.
Tenente Jenerál dehan, FALINTIL-Forsa Defeza Timor-Leste (F-FDTL) liuhusi nia serbisu Diresaun Istória Militár nian, sei akompaña kazu ne’e hodi fó apoiu konsultivu karik presiza atu hadi’a fali lia-loos.
Nia afirma, F-FDTL rekoñese liberdade espresaun, maibé hakruuk uluk ba memória sagradu ema sira ne’ebé mate ona. Hakerek istória ezije kompromisu étiku ne’ebé metin ho lia-loos.
“He’in katak prosesu ida-ne’e la’ós atu haketak, maibé atu hamoos ita-nia narrativa komún no hametin unidade Estadu nian,” nia katak.
Jornalista : Natalino Costa
Editora : Julia Chatarina
