VIKEKE, 28 Abríl 2026 (TATOLI)—Diretór Ensinu Báziku Sentrál (EBC-sigla portugeza), Suku Luka, Postu Vikeke Vila, Munisípiu Vikeke, Leopoldino Pereira, informa impaktu mota Uelolo difikulta estudante sira asesu ba edifísiu EBC Uelolo, nune’e profesór no komunidade deside muda aula bá sentru evakuazaun ne’ebé lokaliza iha Aldeia Uma-Boot, Suku Luka.
“Kondisaun ami-nia edifisiu EBC Uelolo daudaun ne’e kondisaun di’ak, maibé mota Uelolo ne’e sulin tuir estrada, entaun estudante no profesór sira asesu bá eskola labele hakat liu. Ho ida-ne’e ami deside hamutuk muda prosesu aprendizajen provizóriu bá sentu evakuasaun para posesu aprendizajen la’o,” Leopoldino Pereira ba TATOLI iha Postu Vikeke Vila, Tersa ne’e.
Diretór EBC Uelolo ne’e subliña klase sira-ne’ebé atu muda bá sentru evakuasaun ne’e kompostu husi primeiru anu no segundu anu.
“Horisehik (segunda) ami hamutuk ho juventude monta ona tenda hamutuk unidade tolu hodi prepara ba estudante sira uza ba prosesu apredizajen. Komesa ohin estudante sira uza tenda sira iha sentru evakuasaun sai saladeaula provizória ba prosesu aprendizajen,” nia akresenta.
Tuir dadus, estudante EBC Uelolo kompostu husi primeiru anu no segundu anu hamutuk na’in-40 no profesór iha na’in-haat (4).
Iha fatin ketak, delegadu Uma-Boot, Suku Luka, Mariano Mendonça, haktuir autoridade, komunidade no hamutuk profesór sira deside muda estudante sira bá sentru evakuasaun tanba haree ba situasaun udan mota tun afeta ba komunidade nia uma no estudante sira asesu bá eskola labele.
Jornalista: Vitorino Lopes da Costa
Editór: Xisto Freitas da Piedade
