VIKEKE, 29 Abríl 2026 (TATOLI)—Diretór Fundasaun Knua Haberan Komunidade (F-KHK), Augusto Pinto, informa tarifa transporte públiku diresaun Vikeke-Dili daudaun ne’e sa’e ona bá $13, tan ne’e solisita Servisu Diresaun Nasionál Transporte Terrestre (DNTT) tenke kontrolu abastesimentu no bus sira atu labele manipula presu.
“Kustu tarifa Governu presiza tau-atensaun. Dalaruma ita fó sala ba kondutór bus sira-ne’e tanba kondutór sira hasa’e tarifa, maibé ninia impaktu mós ba kondutór bus sira,” Augusto Pinto ba TATOLI iha Postu Vikeke Vila, Tersa ne’e.
Iha fatin ketak, pasajeiru Jaquelina Afonso Guterres haktuir, iha semana kotuk, viajen husi Dili bá Postu Uatulari selu bus $13, maibé iha fulan-Janeiru folin mina seidauk sa’e ne’e viajen bá Postu Uatulari ho kustu kada ema $10.
Maibé, kondutór bus Arabai, Nelson Gaspar, hateten bus Aradai daudaun ne’e matein tarifa $8 tun iha terminál Bekora, maibé pasajeiru sira hakarak lori to’o sira-nia uma selu $10.
Iha fatin ketak, Diretór DNTT Munisípiu Vikeke, Saul Henrique, informa DNTT seidauk hasai despaxu ruma ba bus sira hodi hasa’e tarifa bus, tarifa atuál ba Munisípiu Vikeke mantein, laiha mudansa.
“Foin lalais ne’e, kondutór bus sira mai hasoru ha’u, atu hasa’e tarifa. Maibé, ha’u dehan ba sira hasa’e tarifa ne’e, desizaun husi nasionál. Ne’ebé, sira tenke mantein tarifa anteriór. Tan ne’e, ha’u husu bus sira mantein tarifa. Sé mak viola tarifa, DNTT sei koordena ho tránzitu hodi apreende dokumentu transporte,” nia realsa.
Jornalista: Vitorino Lopes da Costa
Editór: Xisto Freitas Piedade
