DILI 02 Maiu 2026 (TATOLI) – Prezidente Komisaun Rekrutamentu Vaga Kandidatu Estudante Akademia Militár Konjunta 2026, Nuno Manuel Corvêlo de Andrade, fó sai katak kandidatu na’in-214 admitidu iha selesaun dokumentu.
“Totál kandidatura ne’ebé simu hamutuk 320, kandidatu 256 mane no 64 feto. Depois verifikasaun prosesu individuál, kandidatu 214 mak simu ba prova kulturál, ho 173 mane no 41 feto. Kandidatu 106 mak elimina”, Nuno informa liuhusi konferénsia imprensa ne’ebé halo iha Institutu Defeza Nasionál (IDN), Palásiu Governu, sábadu ne’e.
Nia relata katak ba hirak ne’ebé eleminadu tanba kauza husi dokumentu ne’ebé lakompletu hanesan atestadu médiku la válidu ka la entrega, rejistu kriminál nia validade remata, sertifikadu abilitasaun la entrega ka la legaliza, kandidatu nia idade liu limite neʼebé determina, tanba iha rekrutamentu ne’e komisaun tau tinan 20 no labele liu no konfirma iha billete identidade ki’ik liu padraun neʼebé presiza.
“Nune’e, Komisaun Téknika Rekrutamentu no Admisaun aprezenta lista kandidatu sira neʼebé aprova ba prova kulturál ba Ministru Defeza atu halo omologasaun. Eselénsia Ministru Defeza, liuhusi despaxu N.º 035/GMD/IXGC, aprova lista neʼebé aprezenta ona, ne’ebé agora divulga”, nia informa.
Atuál Diretór Interinu Institutu Defeza Nasionál ne’e salienta katak kandidatu sira ne’ebé admite ona ba selesaun dokumentu sei submete ba prova kulturál iha loron 06 fulan-Maiu 2026, oras 09h00 dadeer to’o 17h00 loraik, iha Universidade Nasionál Timor-Leste (UNTL), Hera.
Nia dehan, molok atu bá tuir, iha loron 04 fulan-Maiu, iha tuku 09h00, kandidatu sira sei bá iha Kuartél Jenerál F-FDTL-Fatuhada atu hetan esplikasaun.
Nuno Corvelo adianta katak prosesu selesaun ba iha kandidatu akademia militár konjunta ne’e presiza ema na’in-60, entaun prosesu rigorozu no uza sistema eleminatória.
Bainhira liu iha prova kulturál sei pasa ba iha prova médika, teste saúde iha Ospitál Nasionál Guido Valadares, husi ne’e sé mak admite iha teste sei bá teste aptidaun fíziku iha Sentru Institusaun Komandante Nicolau Lobato Metinaru. Husi ne’e, kandidatu ne’ebé liu sei pasa ba teste aptidaun militár durante loron 10 iha Akademia Militár Konjuta Aileu hodi koko sira-nia prontidaun.
“Husi prova kulturál ne’e, kandidatu sira tenke hatene lia-inglés, portugés, ho di’ak no tenke prienxe faze pur faze. Tanba ne’e eleminatória, kandidatu sira tenke prepara an”, nia sujere.
Nuno Corvêlo hateten komisaun ba rekrutamentu ne’e kompostu husi IDN, F-FDTL, Ministeriu Administrasaun Estatál (MAE) no Edukasaun.
” Komisaun iha kompromisiu atu halo prosesu ne’e ho transparénsia dezde simu konfiansa husi Ministru Defeza hodi realiza rekrutamentu ne’e. Tanba ne’e, ami garante rekrutamentu ba kandaditu estudante akademia militar sei la’o di’ak, laiha titipan iha ne’e, laiha veteranu, ofisiál nia oan iha ne’e, laiha rejime espesiál iha prosesu ne’e. Ida-ne’e nakloke ba Timór-oan hotu, sé mak iha kapasidade nia mak pasa”, afirma.
Notísia relevante: Akademia Militár Konjunta hahú aula dahuluk iha Juñu 2026
Jornalista: Natalino Costa
Editora: Maria Auxiliadora
