MALIANA, 05 Maiu 2025 (TATOLI) – Provedoria Direitu Umanu no Justisa (PDHJ) disponibiliza formasaun durante loron tolu iha suku Holsa, postu administrativu Maliana, ho objetivu atu hasa’e kapasidade lideransa komunitária no membru konsellu suku sira iha área direitu umanu no boa-governasaun.
Diretora Formasaun PDHJ, Joanita Silveira da Costa, hateten katak atividade ida-ne’e importante no durante formasaun loron sei partila matéria kona-ba papél PDHJ, direitu umanu, violasaun direitu umanu, boa-governasaun, violasaun boa-governasaun, tráfiku umanu, violénsia bazeia ba jeneru no materiál espesifiku kona-ba papél lideransa komunitária nian.
Notísia relevante: PDHJ : Tinan 50 Balibo Five, lia loos la mate
“Oinsá mak autoridade suku presta serbisu ba sidadaun sira, nafatin respeita direitu umanu komunidade nian no fó atendimentu ida ne’ebé di’ak ba komunidade hodi promove boa-governasaun”, nia hateten iha intervensaun ba atividade ne’ebé realiza iha sede suku Holsa, tersa-feira ne’e.
Nia hatutan katak PDHJ hein katak informasaun sira ne’ebé partilla ba partisipante sira bele sai referénsia iha sira-nia serbisu loroloron, nune’e komunidade bele hetan atendimentu ne’ebé di’ak no respeita ba direitu umanu.
Iha parte seluk, Reprezentante Administradór Postu Administrativu Maliana, João do Carmo de Fátima, agradese ba PDHJ tanba kolabora ho suku Holsa realiza formasaun ne’e. Nia mos husu ba partisipante sira atu partisipa ho seriedade no bele hetan benefísiu husi matéria importante sira ne’ebé liga ba papél sira-nian iha promove boa-governasaun no respeitu direitu umanu.
Xefe Suku Holsa, António Santa Cruz, dehan formasaun ne’e importante atu hasa’e koñesimentu membru konsellu suku sira kona-ba knaar PDHJ no oinsá sira bele sai matan, tilun no ibun ba komunidade. “Ho formasaun ida-ne’e, ami bele ajuda komunidade liuhusi informasaun loos no hadi’ak servisu atu responde ba nesesidade sidadaun sira”, dehan.
Formasaun ne’e hanesan parte husi esforsu PDHJ atu haforsa governasaun di’ak no proteje direitu umanu iha nivel lokal, liuliu iha suku sira.
Notísia relevante: PDHJ ezije loke investigasaun kle’an ba kazu agresaun fíziku hasoru Cristiano iha Bobonaro
Jornalista: Sergio da Cruz
Editora: Maria Auxiliadora
