DILI, 05 Maiu 2026 (TATOLI)—Primeiru-Ministru, Kay Rala Xanana Gusmão, ho delegasaun ne’ebé akompañadu husi Ministru Primeiru Rekursu no Turizmu Brunei Darussalan nian, Dato Seri Setia Dr. Haji Abdul Manaf Hj Metussin, hala’o vizita ba sítiu Kampong Ayer no galéria turizmu iha Brunei Darussalam, tersa (05 Maiu 2026) ne’e.
Sítiu Kampong Ayer mak fatin ida-ne’ebé importante tebtebes bá kultura no istória Brunei Darusalam nian, ne’ebé hanaran mós hanesan “Venice of the East”, no fatin ne’e idéntiku tanba aldeia ida-ne’e hari’i iha bee leten.
Primeiru-Ministru, Kay Rala Xanana Gusmão, sente interresadu tebes tanba fatin ne’e aliened populasaun sira hela, iha mós fatin ne’ebé prezerva fotografia antigu sira kona-ba Brunei Darussualam nian.
Xefe Governu observa katak Kampong Ayer iha ninia aldeia barak ne’ebé liga-malu ho ponte ai nian, iha uma, meskita (masjid), eskola, loja no estasaun polísia nian iha bee leten.
Enkuantu kulturalmente, Kampong Ayer importante tanba sai sentru moris tradisionál ba povu Brunei durante tinan atus ba atus. Reflete identidade Malay Islam Monarchy (MIB) ne’ebé sai filozofia nasionál Brunei nian, entaun arte, hahán tradisionál no kustume Brunei barak prezervadu iha ne’ebá.
Tuir informasaun katak turista sira bainhira ba Bandar Seri Begawan, dala barak vizita Kampong Ayer atu haree moris tradisionál iha bee leten, tanba iha mós muzéu ida hanaran Kampong Ayer Cultural and Tourism Gallery ne’ebé hatudu istória, arkitetura, no moris komunidade Kampong Ayer nian.
Kampong Ayer mak fatin ida husi povoasaun bee nian ne’ebé boot liu iha Sudeste Aziátiku, fatin ne’e nu’udár destinasaun ida-ne’ebé vizitante estranjeiru sira hakarak pasa tempu iha rai Brunei, tanba Kampong Ayer mós uza fasilidade modernu sira hanesan eletrisidade, WiFi no TV kabel ho totál populasaun 10.000 ne’ebé hela iha ne’e.
Jornalista : Alexandra da Costa
Editór : Cancio Ximenes
