BAUKAU, 07 Maiu 2026 (TATOLI)—Komunidade suku tolu husi Postu Administrativu Baguia, Munisípiu Baukau, ho inisiativa hadi’a rasik estrada diresaun Haekoni bá Afaloikai.
Xefe Suku Osso-Huna, Postu Administrativu Baguia, Paulo dos Reis Piedade, esplika inisiativa ne’e foti tanba kondisaun estrada husi diresaun referida grave kauza husi udan-boot ne’ebé rezulta estrada ku’ak, pasadera Basarwai estragu ne’ebé hamosu ona asidente tráfegu.
“Komunidade hamutuk ho na’in ba karreta sira mak ho voluntariamente hadi’a estrada,” Xefe Suku Ossohuna hateten iha Sentru Konvensaun Baukau (CCB-sigla portugeza) Vila Antiga, Baukau, Kuarta ne’e.
Paulo Piedade relata reparasaun estrada ne’e hala’o iha área risku husi Ribalai, Suku Haekoni to’o Suku Osso-Huna liuhusi métodu taka rai ba estrada iha semana-ne’e hafoin akontese asidente transporte rua hanesan truk no bus halis iha loron Domingu (03/05/2026).
Notisia relevante: Pasadeira Basarwai iha Suku Haekoni estragadu kauza husi udan
Líder suku ne’e konsidera estrada diresaun referida grave nune’e inisiativa hadi’a estrada ho objetivu fasilita movimentasaun transporte públiku liuliu tula produtu lokál sira bá merkadu ho seguru.
“Husu Ministériu Obra Públika atu tau-atensaun lalais ba estrada ne’e, tanba estrada grave liu ona,” Paulo rekomenda.
Estrada diresaun Baguia Vila to’o Uatukarbau, Munisípiu Vikeke ho distánsia kilómetru sanulu-resin kobre suku haat hanesan Alawa kraik, Haekoni, Osso-Huna no Afaloikai ne’ebé atravesa mota rua hanesan Basarwai no Rudoho’o ne’ebé kategoriza grave tanba difikulta movimentasaun transporte.
Entretantu, suku haat iha Postu Administrativu Baguia mak enfrenta kondisaun estrada grave ho totál populasaun hamutuk 6.851 kompostu husi suku Afaloikai ho populasaun hamutuk 1.639, Alawa Karaik 1.934, Haekoni 2.807 no Osso-Huna 894.
Jornalista: Natalino Belo
Editór: Xisto Freitas da Piedade
