DILI, 07 Maiu 2026 (TATOLI)–Ministru Obra Públika (MOP), Samuel Marçal, informa prosesu reabilitasaun estrada urbana no drenajen sira iha kapitál Dili ne’e, balun atinje 60% no balun foin 20% tanba servisu kontinua la’o no balun mak konklui ona maibé balun sei iha prosesu on going.
“Barak liu mak sei on going tanba kompañia kontinua hala’o hela servisu iha terrenu,” Ministru Samuel informa ba jornalista sira iha nia kna’ar fatin, Kaikoli, ohin.
Nia dehan, servisu sira-ne’e tuir etapa la’ós finaliza kedas iha tempu badak hanesan estrada balun nahe ona alkatraun, balun foin ateru, balun kee uluk drenajen molok halo estrada.
Aleinde ne’e, nia informa, projetu reabilitasaun estrada diresaun Ermera ba Letefoho ne’e kompañia seidauk servisu tanba sei hein lisensiamentu husi Autoridade Nasionál Lisensa Ambientál (ANLA) atu harii sira-nia akampamentu.
“Kompañia prontu ona atu servisu, tanba sira mós mobiliza ona ekipamentu ba fatin implementasaun no prosesu prevista mós konklui kle’ur ona, agora hein de’it lisensiamentu husi ANLA,” nia hateten.
Nune’e, nia dehan, sei ba koordena ho ANLA atu atribui lisensiamentu ba kompania hodi harii sira-nia akampamentu ba koloka materiál konstrusaun nian, atu nune’e bele aselera ona servisu iha terrenu.
Jornalista : Alexandra da Costa
Editór : Cancio Ximenes
