DILI, 10 Maiu 2026 (TATOLI)—Primeiru-Ministru, Kay Rala Xanana Gusmão, informa negosiasaun ba Delimitasaun Fronteira Marítima entre Timor-Leste no Indonézia iha ronda datoluk nian, ne’ebé hala’o iha 27 no 29 Abríl 2026 iha Singapura ne’e la’o di’ak tebes.
Notísia Relevante: PM Xanana partisipa negosiasaun ronda datoluk kona-ba fronteira marítima entre TL ho RI iha Singapura
Xefe Governu hato’o kestaun ne’e ba jornalista sira liuhusi konferénsia imprensa ne’ebé hala’o iha aeroportu Internasionál, Nicolau Lobato, Komoro, Dili, domingu ne’e, hafoin halo misaun serbisu iha rai-li’ur.
Xanana dehan, hala’o negosiasaun ronda datoluk ho Indonézia kona-ba fronteira tasi la’o di’ak tebes iha partisipasaun husi delegasaun Indonézia ho di’ak buat ne’ebé akontese tiha ona iha Jogjakarta.
“Ne’ebé seidauk rezolve hotu, tanba ita labele dehan katak ita hetan tiha ona solusaun ba buat hotu-hotu, tanba negosiasaun balun ita toka iha ne’e no ne’eba. La’e, buat ne’e tuir lei internasionál, Indonézia ita hatene arkipelagu, lei sira tau medida kona-ba ida-ne’e no ida-ne’eba, mais ita konsege iha hanesan akordu oan ida kona-ba fronteira husi Ataúru ba to’o Lautein. Ne’ebé, ami konkorda malu Agostu iha fali Bali sei haree husi Óekusi ninian, parte Lautein ba to’o Jaco, husi Suai, ne’ebé ita husu boot ne’e sei la’o ho di’ak,” Xefe Governu ne’e hateten.
Lembra katak, begosiasaun ba Delimitasaun Fronteira Marítima entre Timor-Leste no Indonézia iha ronda datoluk nian, durante loron tolu, entre 27 no 29 Abríl, iha Singapura, marka progresu ne’ebé signifikativu.
Negosiasaun ronda datoluk iha Singapura ne’e hanesan kontinuasaun husi enkontru primeira ronda ne’ebé hala’o iha Dili, iha Agostu 2025, no segunda ronda ne’ebé hala’o iha Jogjakarta, Indonézia, iha Dezembru 2025.
Primeiru-Ministru, Kay Rala Xanana Gusmão, ne’ebé akompaña direta ekipa negosiasaun Timór ne’e konsidera iha susesu boot, tanba parte rua loke-an, rona malu no konsege iha entendimentu ida hodi la’o tuir de’it Lei Direitu Internasionál Tasi nian.
Husi rezultadu negosiasaun ronda datoluk ne’e hothotu konkorda katak, fulan-Agostu tinan 2026 ne‘e avansa ba ronda dahaat negosiasaun nian ne’ebé desididu atu hala‘o iha Bali-Indonézia.
Jornalista : Nelson de Sousa
Editora : Cancio Ximenes
