OEKUSI, 14 Maiu 2026 (TATOLI) – Sekretáriu Estadu Kooperativa (SEKoop) hamutuk ho Autoridade Rejiaun Administrativa Espesiál Oekusi Ambeno (RAEOA), kinta ne’e, hala’o serimónia kolleta ba produtu lokál Bafo Kayrala hamutuk ektare neen (6) iha área Samoro, Suku Costa, Sub-rejiaun Pante Makasar.
Diretór Jerál SEKoop, Oldarico Lopes, fó mós ninia apresiasaun no agradesimentu ba grupu agrikultór sira ne’ebé ho inisiátiva rasik konsege dezenvolve produtu ne’e iha Oekusi.
Nia esplika katak Governu iha vizaun boot ba futuru atu transforma produtu ne’e sai ai-han ho forma oioin ne’ebé iha valór ekonómiku aas, hanesan 1) Planu Estratéjiku: SEKoop tau ona iha Planu Asaun Anuál (PAA) atu transforma Bafo Kayrala sai sasoro (bubur), dose, xokolate, no produtu kulinária seluk; 2) Seguransa Alimentár: Tanba Bafo Kayrala hanesan ai-han ida ne’ebé saudavel, Governu sei dudu komunidade no grupu agrikultór sira iha munisípiu hotu-hotu atu kuda barak liután.
“Governu propoin ba SEKoop atu hamutuk ho agrikultór sira kontinua halo produsaun. Ita-nia planu iha futuru mak atu fornese produtu ne’e ba Programa Merenda Eskolár (PME) iha eskola sira, maibé ida-ne’e depende mós ba kuantidade ne’ebé ita prodús,” Oldarico informa iha ámbitu seremónia kolleta iha bairru Samoro Oekusi, ohin.
Apoiu husi Autoridade RAEOA
Iha biban hanesan, Diretór Serbisu Seguransa Alimentasaun RAEOA, Andre La’o, louva tebes programa SEKoop nian ne’ebé durante ne’e fó akompañamentu ba agrikultór sira hodi kuda ai-han lokál.
“Iha futuru, Autoridade RAEOA liuhusi Serbisu Rejionál Seguransa Alimentár sei foti responsabilidade hodi serbisu hamutuk ho agrikultór sira, atu nune’e bele hasa’e liután kuantidade produsaun Bafo Kayrala iha Oekusi,” Andre salienta.
Bafo Kayrala la’ós de’it produtu agríkola baibain, maibé sai nu’udar kbiit ida atu hadi’a nutrisaun família nian no promove dezenvolvimentu ekonomia lokál. Governu nia polítika mak kontinua hametin parseria ho agrikultór sira hodi transforma dezenvolvimentu iha baze.
Notísia relevante:SEKoop no Kooperativa 3K-T asina akordu sosa Bafo Kayrala husi produtór sira
Jornalista: Abílio Elo Nini
Editór: Rafael Ximenes de A. Belo
