DILI, 27 Maiu 2026 (TATOLI)–Komandante Unidade Polísia Marrítima (UPM), Superintendente Xefe Polísia Eugénio Pereira destaka fortalese kapasidade operasionál ámbitu tinan 23 ezisténsia instituisaun.
“Ba futuru, Unidade Polísia Marrítima iha objetivu estratéjiku hodi konsentra iha área sira hanesan fortalesimentu kapasidade operasionál, presiza aumenta númeru embarkasaun operasionál, moderniza ekipamentu marrítima, dezenvolve sistema resposta rápida ba insidente marrítimu,” iha sebrasaun tinan 23 ezisténsia Unidade Polísia Marrítima (UPM),
Iha parte seluk, dezenvolvimentu iha área domíniu marrítima iha era moderna no informasaun sai hanesan instrumentu importante iha seguransa marrítima. Tanba ne’e, UPM presiza implementa sistema monitorizasaun integrada, uza teknolojia dijitál no satelit inklui aumenta kapasidade intelijénsia marrítima.
Nia dehan, UPM mós foku ba fortalesimentu rekursu umanu iha futuru tanba seguransa marrítima dependente ba kualidade rekursu umanu. Tanba ne’e, presiza formasaun espesializada, dezenvolve lideransa profisionál, no promove kultura disiplinár no integridade institusionál.
Ba oin UPM mós fortalese kooperasaun internasionál ne’ebé fó ameasa ba área marrítima no la respeita fronteira nasionál.
“Unidade Polísia Marrítima presiza fortalese kooperasaun bilaterál no multilaterál, aumenta partilla informasaun no partisipa ativamente iha inisiativa seguransa marrítima rejionál.
Notísia relevante : Tinan 23 ezisténsia, KomJer Afonso husu UPM kontinua serví ho lealdade no profisionalizmu
Nune’e mós, ba oin UPM sei halo protesaun soberania no rekursu marrítimu iha Tasi Timor ne’ebé iha poténsia ba ekonomia, inklui sei sai mós guardian ne’ebé forte atu proteje soberania nasionál, rekursu peskeiru no Estadu nia interrese estrátéjiku.
“Ami hakarak rekomenda ba Sua Exelénsia Komandante Jerál PNTL nomós ba parseiru sira hotu, kontinua fortalese polítika dezenvolvimentu Unidade Polísia Marrítima, aumenta apoiu ba formasaun espesializada, prioritiza modernizasaun ekipamentu marrítimu, no integra seguransa marrítima hanesan prioridade estratéjika nasionál,” nia tenik.
Nia rekomenda ba Governu atu aumenta investimentu iha área seguransa marrítima, fortalese infraestrutura marrítima nasionál, apoia dezenvolvimentu sistema Domíniu Marrítima Nasionál, no promove polítika seguransa marrítima integrada atu responde ba ameasa transnasionál sira.
Komandante UPM hato’o apresiasaun no agradesimentu a’as ba membru hotu ne’ebé durante tinan barak dedika-an ho laran tomak hodi serví instituisaun, Estadu no povu Timor-Leste.
“Durante dalan naruk ne’ebé Unidade Polísia Marrítima liu ona, ita hotu hatudu katak serbisu iha área marrítima la’ós deit hanesan obrigasaun profisionál, maibé mos hanesan misaun patriótika atu defende soberania nasionál, garante seguransa Tasi Timor no proteje interrese estratéjiku nasaun,” nia katak.
Komandante Eugénio reafirma katak responsabilidade membru ne’e nobre no importante tebes ba Estadu.
“Tasi Timor-Leste la’ós deit sai hanesan rekursu ekonomia ba povu, maibé mós sai hanesan porta estratéjika soberania no seguransa nasionál. Tanba ne’e, membru hotu tenke kontinua hala’o knaar ho sentidu patriotizmu, lealdade, integridade no responsabilidade a’as,” nia hameno.
Biban ne’e, Komandante UPM enkoraja membru sira hotu atu kontinua hametin disiplina institusionál no profesionalizmu iha serbisu loron-loron.
“Disiplina maka baze prinsipál ba forsa seguransa ida-neʼebé forte no respeitadu. Laiha disiplina no instituisaun sei labele hetan konfiansa husi Povu no Estadu. Nune’e mos, profisionalizmu tenke sai kultura serbisu neʼebé moris iha membru idaidak, liuhusi atitude responsável, respeitu ba lei no regulamentu, inklui kapasidade atu hala’o serbisu ho efisiénsia no transparensia,” nia afirma.
Nune’e mós presiza kontinua hametin unidade no solidariedade entre kolega sira, evita atitude neʼebé bele estraga dignidade instituisaun, no sempre tau interese nasaun no povu iha fatin a’as liu duké interese pesoál.
“Polísia Marrítima tenke sai ezemplu di’ak ida ba sosiedade, iha maneira halo serbisu, trata sidadaun sira, no iha maneira implementa autoridade ho sabedoria no umanidade. Povu Timor-Leste hein katak ita sai protetór sira ne’ebé prontu atu serve ho sinseridade no espíritu sakrifísiu,” nia katak.
Komandante rekoñese, iha futuru, dezafiu seguransa marrítima sei kontinua aumenta, tantu iha kombate atividade ilísita, krime transnasionál, peska ilegál, tráfiku ilegál no ameasa seluk iha espasu marrítimu nasionál.
“Membru hotu presiza kontinua dezenvolve kapasidade profesionál, aumenta koñesimentu no adapta-an ho mudansa estratéjika neʼebé akontese iha ambiente seguransa marrítima globál. Hametin ita-nia espíritu serbisu hodi Serve Nasaun, Proteje Soberania, Garantia Seguransa Marrítima,” nia hato’o.
Jornalista : Natalino Costa
Editora : Julia Chatarina
