DILI, 30 Maiu 2026 (TATOLI)—Hafoin Governu liuhusi Autoridade Munisípiu Dili ofisialmente implementa serbisu estasionamentu iha Areia Branka ka Kristu-Rei, Dili, iha loron 26 Maiu 2026, daudaun ne’e motorista balun hahú kontribui ona taxa ba Estadu iha área referida.
Aplikasaun taxa referida bazeia ba Dekretu-Lei númeru 3/2017, 22 Marsu, kona-ba selu taxa ba fatin estasionamentu iha área Kristu-Rei, Dili.
Ofisiál estasionamentu, Vicente Soares, ne’ebé destaka iha Kristu-Rei, hateten atividade rekolla taxa ba estasionamentu hahú iha loron 26 Maiu 2026.
“Ami ofisiál ne’ebé destaka iha ne’e hamutuk na’in-14, iha-ne’ebé na’in-hitu serbisu loron no na’in-hitu serbisu kalan,” Vicente Soares hateten ba TATOLI iha Kristu-Rei, Dili, Sábadu ne’e.
Nia haktuir katak serbisu kontrola estasionamentu ne’e di’ak maibé iha maluk balun ne’ebé seidauk iha konxiénsia atu selu tanba balun mai mai ho razaun dehan osan rahun laiha, osan tomak no balun para iha li’ur haruka tama mai mós la tama mai.
Notísia relevante: PAM Dili presiza halo ezersísiu hafoin destaka pesoál iha estasionamentu Kristu Rei
Vicente esplika, kritéria selu mak transporte (karreta) para durante minutu 60 selu $1, ba motór to’o minutu 60 selu $0,50.
“Ita sura la’ós to’o oras maibé hahú mai para ne’e kategoria selu ona to’o minutu 60, maibé liu minutu 60 ba karreta selu $2 no motór selu $1,” nia subliña.
Hafoin implementa taxa ne’e, Vicente informa, movimentu komunidade bá iha Kristu-Rei volume diferente iha kada loron kompara ho finde semana. Kada loron ema uitoan no finde semana ema barak.
“Entaun taxa ne’ebé ita rekolla mós tuir ida-ne’e. Ba loron baibain, loron ida ita hetan $30 to’o $40, maibé ba Sábadu no Domingu ita hetan $50 bá leten. Maibé, difikuldade ne’ebé ita hasoru mak vizitante sira mai lakohi para iha laran. Ida-ne’e hanoin Polísia Tránzitu mós bele haree, tanba iha li’ur seidauk aplika taxa entaun ema mai para hotu iha li’ur,” nia dehan.
Iha biban ne’e, nia parte rekomenda ba vizitante sira katak, bainhira bá vizita Kristu-Rei, tenke para iha fatin estasionamentu nune’e bele kontribui taxa ba Estadu.
Iha fatin hanesan, vizitante Rui da Cruz, hateten antes ne’e nia parte seidauk iha informasaun kona-ba selu taxa ba fatin estasionamentu iha fatin área Kristu-Rei.
“Ha’u ohin foin hatene. Maibé, ba ha’u, ida-ne’e di’ak tebes. Ita mai para iha laran tanba ita-nia sasán seguru bainhira bá halo ezersísiu no hariis-tasi. Ita tenke halo hanesan ne’e para kontribui ba ita-nia nasaun, tanba fatin turizmu iha ema-nia nasaun ita bá tenke selu. Tanba ne’e, tempu ona ita kontribui reseita ba Estadu, basá ida-ne’e mós hola-parte ba dezenvolviomentu nasaun nian,” nia konklui.
Jornalista: Arminda Fonseca
Editór: Xisto Freitas da Piedade
