BOBONARU, 03 Juñu 2026 (TATOLI) – Komandu Polísia Nasionál Timor-Leste (PNTL) Munisípiu Polísia Bobonaru rejista asidente tráfegu hamutuk 42 inklui na’in-tolu lakon vida durante períodu fulan Janeiru to’o fulan Maiu tinan ne’e.
Segundu Komandante Komandu Munisípiu Polísia Bobonaru, Superintendente Carlos Moniz, relata hosi totál asidente ne’e rezulta ema-nain tolu mak lakon vida iha fulan marsu, abríl no fulan maiu nia-laran.
Notísia relevante: Laiha testemuña no CCTV difikulta PNTL investiga asidente Maravilla
“Hahú husi janeiru to’o maiu ita iha kazu totál 42, janeiru haat, fevereiru ualu, marsu 11, abríl tún mai sia, ita mai fali iha maiu sa’e fali ba 12, hosi totál ne’e konsege halakon ema na’in-tolu nia vida, ida iha Marsu, ida iha Abríl no ida iha Maiu nia laran, hosi kazu hirak ne’e bai-bain ita halo prosesu, rekolla evidénsia, kompleta dokumentu hafoin dentru de oras 72 ita enkamiña ba iha Ministériu Públiku nu’udar na’in ba prosesu,” nia informa ba jornalista sira, iha kna’ar-fatin, tersa ne’e.
Superintendente Carlos, subliña bazeia ba informasaun no evidénsia ne’ebé Seksaun Tránzitu Seguransa Roduviáriu kazu ne’ebé rekolla ih terrenu maioria kauza husi fatór umanu.
“Ita hatene agora governu halo ona estrada ne’ebé maka kabeer, husi Dili mai to’o Batugade, sa’e mai to’o Tunubibi – Maliana Vila mós kabeer ona, entaun fatór umanu ne’e mai husi saida, ita la konsiente ita-nia vida importante, mas ita haree dalan kabeer, liman-katar, ain-katar ita halai haluha tiha sinais (sinál) tránzitu vertikál ne’ebé mak koloka iha dalan,” nia fó hanoin.
Nune’e mós menus koñesimentu no konsiénsia kona-ba importánsia sinál tranzítu no uza ekipamentu seguransa hanesan kapasete.
“Sira hanoin katak sinais sira ne’ebé tau ne’e hanesan hiasan de’it, ida fali ita laiha konsiénsia kle’an kona-ba kapasete, sira uza kapasete tan de’it dehan polísia atu tilang, mas loloos ne’e kapasete polísia obriga uza atu hodi salva ita-nia vida, ita abandona tia,” nia katak.
Notísia relevante: Asidente tráfegu iha Palaka rezulta ema na’in-rua mate
Jornalista: Sérgio da Cruz
Editór: Evaristo Soares Martins
