DILI, 03 Juñu 2026 (TATOLI)—Ministra Edukasaun, Dulce de Jesus Soares, orienta dirijente eskola sira hotu atu estabelese aula reforsa iha Sábadu.
“Tuir loloos loron Sábadu eskola sira tenke halo aula reforsa ba estudante sira inklui mós atividade estra-kurrikulár,” Ministra Dulce haktuir ba jornalista sira iha Vila-Verde, Dili, Kuarta ne’e.
Ministra Edukasaun dehan importánsia hosi aula reforsa ne’e atu eleva komprensaun estudante nian ba matéria ne’ebé difísil hanesan matéria ezata sira, tanba iha Segunda to’o Sesta dalaruma ladún kompleta entaun presiza ida-ne’e.
Aleinde ne’e, nia haktuir, iha aula normál fó teoria ba estudante no iha Sábadu bele halo pratika, ida-ne’e mak objetivu prinsipál ida ba Ministériu Edukasaun atu aplika iha eskola, hodi hasa’e koñesimentu no bele prepara ba ezame períodu no ezame nasionál.
Iha parte seluk, Diretór Eskola Sekundária Jerál 12 Novembru Bekora, Marcelino Menezes, informa eskola ne’ebé nia líder aplika aula reforsa bainhira selebra loron nasionál sira iha loron efetivu.
“Loron boot sira sempre monu iha loron efetivu sira, entaun ami orienta profesór sira atu kompleta fali matéria iha aula reforsa kada loron-Sábadu. Aleinde ne’e, parte eskola mós sempre aplika aula reforsa ba estudante sira-ne’ebé seidauk komprende kona-ba matéria,” nia dehan.
Nia fundamenta husi aula reforsa ne’e espera katak estudante sira bele komprende matéria ne’ebé mak profesór sira fó, no iha aula reforsa ne’e estudante sira partisipa ho másimu tebes, tanba bainhira atu iha aula reforsa profesór sira fó uluk avizu ba estudante sira.
Nune’e mós, Diretór Eskola Sekundária Jerál Fitun Naroman Timor Lorosa’e (FINANTIL), Aniceto Berlelo, informa eskola ne’e implementa ona aula reforsa ba estudante sira kona-ba matéria ne’ebé dalaruma hanorin seidauk hotu, oras ramata.
“Entaun liuhusi aula reforsa ne’e bele halo kompleta liután matéria ba ita-nia estudante. Karik iha Segunda to’o Sesta la kompleta. Iha-ne’e liuliu ba matéria matemátika, IT no seluk tán,” nia tenik.
Jornalista: Osória Marques
Editór: Xisto Freitas da Piedade
