DILI, 03 Juñu 2026 (TATOLI)—Ministériu Justisa (MJ) no Komisaun Nasionál Aprovizionamentu (CNA, sigla portugéz) hahú forma ona juri ba dezeñu Sentru Juveníl.
“Komisaun Nasionál Aprovizionamentu iha tempu badak sei harii juri sira ne’ebé kompostu husi CNA sira-nia rasik nomós mai husi dono do projeto husi Ministériu Justisa, atu nune’e bele akumula hamutuk, nune’e tempu badak CNA loke ona konkursu ba dezeñu sentru reabilitasaun,” Diretór Servisu Prizionál no Reinsersaun Sosiál, Delfio Soares Alves, hateten ba Jornalista sira iha ninia knaar fatin, Kolmera, Kuarta ne’e.
Iha parte seluk, Sekretariadu Grande Projetu, Ministériu Planeamentu, Investimentu Estratéjiku (MPIE) no Konsellu Administrasaun Fundu Infraestrutura (KAFI) rezolve ona prosesu konkursu ba dezeñu Sentru Juveníl.
Notísia relevante : Tinan 2024-2025, CNA rejista projetu hamutuk 430
CNA daudaun ne’e forma ona ekipa ne’ebé kompostu husi membru CNA rasik no simu projetu MJ hodi hahú loke konkursu ba dezeñu kontrusaun Sentru Juveníl.
Nia dehan, CNA tenke forma uluk juri, nune’e bainhira publika anúnsia dezeñu ba Sentru Juvenil ne’e, juri hirak ne’e mak bele halo serbisu hodi selesiona empreza ne’ebé tama iha rekezitu hodi halo dezeñu.
Diretór rasik seidauk hatene orsamentu hira mak prevee, nune’e, CNA mak sei publika.
“Kuandu juri sira forma ona, entaun iha tempu badak CNA sei halo publikasaun ba públiku konkursu ba Sentru Juveníl,” nia katak.
Jornalista : Natalino Costa
Editora : Julia Chatarina
