DILI, 21 Juñu 2026 (TATOLI )–Karketu Dili FC konsege sita vitória dramátiku 1-0 hasoru Porto Taibesi FC. Golu mesak husi Reksy Kurniawan iha minutu 89 salva Karketu hodi mantein pozisaun hodi lidera klasifikasaun provizóriu iha Liga Futeból Timor-Leste (LFTL) époka 2026.
Jogu ba ekipa rua realiza iha Estádiu Munisipál Dili, Domingu kalan ne’ebé ánimu tebes husi adeptu klube rua nian.
Árbitru Pedro Carvalho lidera jogu ne’e. Desde minutu dahuluk, ekipa rua lansa kontra-atake ba malu tuir tékniku no abilidade ne’ebé ekipa ida-idak iha. Porto Taibesi defende ho organizasaun, enkuantu Karketu domina pose bola no buka espasu.
Notísia relevante : Primeira Divizaun LFTL: Karketu liki Coração ho golu mihis 1-0
Maski jogu la’o durante minutu 45 nia laran, ekipa rua hatudu forsa ne’ebé hanesan la rezulta golu to’o tama intervallu.
Hakat ba parte daruak ekipa rua kontinua halo presaun ba malu, Porto Taibesi hatudu jogu ne’ebé brillante meibé falla iha finalizasaun ikus la rezulta golu.
Karketu halo atake ne’ebé maka’as maibé Avansadu Angenucu Viegas ho nia kolega sira susar atu prodús golu tanba taka metin husi defza Porto Taibesi nian.
Skor 0-0 to’o minutu ikus. Kuandu ema hotu hanoin jogu sei termina empata, Reksy Kurniawan surji iha minutu 89 hodi marka golu desizivu. Golu ne’e lori festa ba banku suplente Karketu no fó pontu tolu importante.
Ho vitória 1-0 ne’e, Karketu Dili FC rekolla pontu 9 husi jogu 3, rekorda la lakon ida. Rezultadu ne’e hada’ak ekipa ba topu tabela klasifikasaun provizóriu, enkuantu ekipa seluk hela iha okos.
Jogadór husi ekipa Karketu DILI FC
Egidio de Oliveira, Nelson Viegas, Reksy Kurniawan, Orcelio da Silva, Barnabas Sobor, Santiago da Costa, Natalino da Costa, Carlos Sousa, Zenivio Mota, Daniel Asino, Angenuco Viegas.
Jogadór husi Porto Taibesse FC
Baptista Ola, Daniel Appiah, Aurio da Costa, Carol Moreira, Jerico Piedade, Lazio Piedade, Claudio Martins, Muhamad Gaushirowi, Mohamad Albar, Gregorio Silva, Jardel Piedade.
Jornalista : Hortêncio Sanchez
Editora : Julia Chatarina
