DILI, 22 Juñu 2026 (TATOLI)—Reprezentante Partidu FRETILIN, Antoninho Bianco apela ba ema hotu-hotu atu halo orasaun no fó esperansa nune’e Saudozu Francisco Guterres Lú Olo bele hetan ksolok rohan laek iha reinu Lalehan hodi hatutan kbiit no forsa ne’ebé sei moris.
“Horikalan, 21 Juñu 2026, iha tuku 21:30, ita-nia na’in-ulun, eroi boot Francisco Guterres Lú Olo, termina nia jornada moris nian iha mundu iha Ospitál Prince Court, Kuala Lumpur, Malázia. Iha tempu ne’ebé ita hotu atravesa situasaun ne’ebé difísil, ita hotu hamutuk neon ida, laran ida hodi hasa’e ita-nia orasaun ba Aman Maromak atu ita-nia Saudozu ne’ebé husik ona mundu ne’e bele hetan ksolok rohan laek iha reinu Lalehan. Família tomak bele hetan kbiit hodi hatutan servisu ba rai no povu ida-ne’e,” Reprezentante Partidu FRETILIN, Antonino Bianco dehan iha Komité Sentrál FRETILIN (CCF-sigla portugeza), Komoro, Dili, Segunda ne’e.
Nia haktuir Saudozu nia dedikasaun estraordinária hodi lidera órgaun soberanu Asembleia Konstituente, nu’udár Prezidente Asembleia Konstituente, Prezidente Parlamentu Nasional, Prezidente Repúblika RDTL no atuál Prezidente Partidu FRETILIN, to’o termina nia moris.
“Tanba ne’e, memória sira tomak husik hela ba povu no rai ida-ne’e. Ba partidu FRETILIN ita hotu bele orgullu tanba ho dedikasaun firmeza ne’ebé Saudozu halo ba rai ida-ne’e. Nune’e loron hitu ne’ebé deside ona, mai ita hamutuk ho sentidu lutu nasionál,” nia dehan.
Deputadu Bankada FRETILIN ne’e apela ba ema hotu atu akompaña hodi fó onra ba Saudozu ne’ebé sei sai hosi Malázia iha aban (23 Juñu) tuku 01:00 Otl no to’o iha Dili tuku 06:00 Otl. Oráriu provizóriu ba xegada Saudozu nian mak sei bá uluk nia rezidénsia hafoin to’o Dili, tuir mai CCF, Palásiu Prezidensiál no tuirmai sei estabelese konsensu ho órgaun soberanu.
Jornalista: Osória Marques
Editór: Xisto Freitas da Piedade
