DILI, 23 Junu 2026 (TATOLI)—Iha tersa (23 Juñu 2026), tuku 05h00 dadeersan, povu Timor-Leste hahú la’o nadodon ba Aerportu Internasionál Prezidente Nicolau Lobato, Komoro, hodi hein mate-isin maktoban saudozu Frnacisco Guterres Lú Olo ne’ebé translada husi Malázia, ho Aero Dili, ne’ebé to’o iha aeroportu iha tuku 06h34.
Bainhira to’o iha Aeroportu Dili, timoroan sira liuliu ferik eh katuas, klosan eh labarik, hamutuk ho familia maktoban, simu maktoban nia mate-isin ho maten-ween hodi tanis no sura “Avó Lú mai ona”. Ema wa’in ba wa’in, hamriik ho matan-ween hodi simu maktoban nia mate-isin.
Husi rohan ba rohan, husi matan ba matan, husi labarik kiik to’o ema boot sira-ne’ebé hamriik hakonu Aeroportu Internasionál Nicolau Lobato ho matan-ween.
Estudante ida husi Universitariu Nacional Timor Lorosae (UNTL), Raimundo Soares Simões, hato’o nia sentimentu triste be kle’an tebes tanba sente lakon líder nasionál ida-ne’ebé hadomi povu no rai-lulik Timor-Leste ne’e liuhusi ninia dedikasaun durante tinan 24 luta iha ai-laran no bainhira Timor-Leste selebra tinan 24 ukun rasik an, líder ne’e hakotu nia jornada moris,
”Ha’u sente lakon líder ida-ne’ebe mak lakon maske nia serbí rai ne’e ho domin ho fuan no ikus lakon iha ita nia leet,” Raimundo Soares Simoes hateten ba Agência TATOLI iha Aeorportu Internasional Nicolau Lobato, ohin.
Hanesan estudante banhira hakat sai husi uma Becora mai Aeroportu hodi hein maktoban nia mate-isin ne’ebe mak atu mai husi Nasaun Malázia.
”Ha’u sai husi uma dadeer tuku lima mai iha ne’e hodi hein ita-nia lider ne’ebé mak lakon iha ita-nia leet, Maske dook maibé ha’u nafatin mai hein tanba nia mak líder ida-ne’ebé mak husik ona ita,” nia dehan ho lian neineik.
Lider Nasionál, nu’udar mós Prezidente Partidu FRETILIN, Francisco Guterres “Lú-Olo”, Domingu (21 Juñu 2026) ne’e, hakotu iis iha Ospitál Prince Court, Kuala Lumpur, Malázia, hafoin halo tratamentu saúde intensivu.
Francisco Guterres “Lú-Olo” nu’udar Deklaradór Restaurasaun Independénsia RDTL nian no sai Prezidente Parlamentu Nasionál 2002 2007 no sai Prezidente Repúblika 2017-2022.
Baibain ema bolu nia naran revolusionáriu “Lú Olo” ne’ebé ho naran sarani Francisco Guterres ne’e moris iha Postu Ossú, Munisípiu Vikeke, iha 07 Setembru 1954.
Lú-Olo kaben ho Cidália Lopes Nobre Mouzinho Guterres, no sira iha oan na’in-haat mak hanesan Francisco Cidalino, Eldino Nobre, Felezito Samora Guterres no Dália Luliana Nobre Guterres.
Husi 1963 to’o 1969 Lú-Olo estuda iha Koléjiu Santa Teresinha iha Ossu, no iha tempu ne’e nia simu instrusaun eskolár husi Padre Salesiano sira. Iha tinan 1969 nia ramata kuarta klase.
Jornalista : Felicidade Ximenes
Editór : Cancio Ximenes
