Lú Olo, HEROI ba Pátria no Povu

Kalohan nakukun, abu-abu falun rai,

Foho no tasi sira halerik no lun turuk,

Loron mos subar nia matan ho triste.

Teki teki, hanesan mehi ida mosu mai,

Anin lori rekadu lutu ba Timoroan,

Lakon oan boot ida ba Pátria no Povu.

Mak toban, Francisco Guterres “Lú Olo”,

Herói ida ne’ebé fó nia moris tomak,

Hanesan fitun ida iha kalan nakukun,
Haroman dalan ba Timor foun ida.

Lú Olo, HEROI ba Pátria no Povu.

O Nia Ko’alia tau Prátika, O hateten,

“Keta liman lais, ita han ona iha ita-nia bikan,

Labele ba han tan iha povu nian”.

Lú Olo, HEROI ba Pátria no Povu.

Rai ne’ebé Ita-Boot hadomi hakilar no halerik,
Tanba lakon nia oan, ne’ebé fó nia an tomak,

O nia Sakrifísiu hanesan tasi ne’ebé luan.

Lú Olo, HEROI ba Pátria no Povu.

Foho, tasi no Rai Timor sei ko’alia nafatin,
Hodi konta istória ba jerasaun Povu Maubere,

Hanesan nanoik Ita-Boot husik hela…

“Bee ne husik halai to’o nia ikus,

Labele taka netik bee nia dalan,

Selae natar iha rohan ne’ebá, laburas”.

Hanesan udan rihik fó bokon no matak,
Ba foho a’as, tasi luan, ba rain hotu-hotu,

“Lú-Olo” O nunka sura o nia kolen.

Deskansa iha dame, patriota no HEROI. 

22/06/2026

Dili, Becora

Cristovão PEREIRA (likuliku)